Aİ ilə ABŞ arasında gec tez razılaşma əldə olunacaq -AÇIQLAMA
Avropalı avadanlıq istehsalçıları arasında yüksək polad tariflərinə görə qəzəb artdığından ABŞ və Avropa İttifaqı arasında iyul ayında razılaşdırılmış ticarət sazişi artıq təhlükə altındadır. Müqavilənin bağlanmasından iki ay keçməmiş Avropadakı istehsalçılar yeni bürokratik əngəllərdən şikayətlənir, müqaviləyə dəyişiklik edilməsini və ABŞ-a ixracın dayandırılmasını tələb ediblər. Buna səbəb kimi isə prezident Donald Trampın administrasiyasının metallara 50%-lik rüsumları genişləndirərək tərkibində polad və alüminium olan yüzlərlə əlavə məhsulun daxil edilməsi qərarı göstərilir.
Nəticədə, bir çox Avropa istehsalçısı, əksər mallar üçün Tramp və AB tərəfindən razılaşdırılan 15% -dən daha yüksək tariflərlə üzləşib. Maraqlıdır Donald Trampın qoyduğu ağır rüsumlarla Aİ və ABŞ ticarət razılaşmasının qüvvədə qalması nə qədər realdır. Ümumən sona qədər davam edə biləcəkmi bu əməkdaşlıq?
Məsələ ilə bağlı Crossmedia.az-a açıqlama verən iqtisadçı ekspert Natiq Cəfərli Donald Trampın strategiyasının müttəfiqləri yüksək standartlara cavab verən sazişlər imzalamağa məcbur etməkdən ibarət olduğunu qeyd edib: "Amerika Birləşmiş Ştatlarının yeni administrasiyasının, daha dəqiq desək, Donald Trampın strategiyası müttəfiqləri yüksək standartlara cavab verən sazişlər imzalamağa məcbur etməkdən ibarətdir. Yaxın vaxtlarda ABŞ ilə Avropa İttifaqı arasında bir saziş imzalanmış və sənədə Ursula fon der Lyayen qol çəkmişdir. Lakin Avropa İttifaqına üzv dövlətlər arasında belə səslər eşidilməyə başlamışdır ki, Avropa Komissiyasının bütövlükdə İttifaq adından belə bir saziş imzalamaq səlahiyyəti yoxdur. Bu isə ABŞ ilə Avropa İttifaqı arasında ciddi hüquqi mübahisələrin yaranmasına gətirib çıxarır".
Ekspert həmçinin bu məsələ ilə bağlı gec-tez razılaşmanın olacağını bildirib.
"Bununla belə, ehtimal olunur ki, gec-tez razılaşma əldə olunacaq. ABŞ-ın mövqeyi kifayət qədər aydındır: Avropa Amerikaya daha çox məhsul ixrac edir, nəinki Amerika Avropaya. Prezident Trampın məqsədi isə məhz bu ticarət balansını tariflər vasitəsilə normallaşdırmaqdır"- deyə ekspert əlavə edib.
Elmir Heydərli
13:07 08.09.2025
Oxunuş sayı: 6460
