Rusiyanın tələbləri vəziyyəti gərginləşdirir: Ukrayna parçalanır və məhv olur -RƏY
Rusiya ilə Ukrayna arasında davam edən müharibə artıq illərdir ki, beynəlxalq gündəmin əsas mövzusu olaraq qalır. Qərb ölkələrinin vasitəçilik cəhdlərinə və sülh çağırışlarına baxmayaraq, proses həlli hələ də uzanır. Moskvanın irəli sürdüyü şərtlər və Kiyevin mövqeyi arasında dərin ziddiyyətlər var. Ukrayna rəsmiləri bildirirlər ki, Rusiya qeyri-real və qəbuledilməz tələblərlə manipulyasiya edir, bu isə danışıqların nəticəsiz qalmasına gətirib çıxarır.
Müharibənin uzanma səbəbləri barədə Crossmedia.az saytına açıqlama verən politoloq Aytən Qurbanova Ukraynanın mövqeyinin tamamilə haqlı və əsaslı olduğunu bildirib: " Mən hesab edirəm ki, Ukrayna tərəfindən səsləndirilən bu fikirlər tamamilə haqlı mövqeyin ifadəsidir. Çünki Rusiyanın ortaya qoyduğu şərtlər heç bir halda Ukrayna tərəfindən qəbul edilə bilməz. Ukraynanın ərazi bütövlüyünün və suverenliyinin gözardı edilməsi, ölkənin parçalanması ilə bağlı tələblər, eləcə də NATO və Avropa İttifaqına inteqrasiya məsələlərinə dair diktəedici yanaşmalar suveren və müstəqil dövlət tərəfindən qəbul edilə bilməz və qlobal sistemin də belə təsir göstərə biləcəyi ehtimalı yoxdur.
Reallıq isə odur ki, iki ildən artıqdır davam edən müharibə nəticəsində Ukrayna ərazisinin böyük hissəsi işğal olunub və masada həmin işğal altındakı ərazilərin Rusiya tərəfindən “öz ərazi bütövlüyü çərçivəsində tanınması” istiqamətində təzyiq mexanizmləri ortaya çıxıb. Bu, Ukrayna üçün ciddi narahatlıq doğuran əsas məsələlərdən biridir.
Rusiyanın ilkin gündəmdə ifadə etdiyi tələblər Ukraynanın Avropa inteqrasiyası və NATO üzvlüyü ilə bağlı məsələləri tamamilə gündəlikdən çıxarmaq, nüvəsizləşmə zəmanətini əldə etmək və bir sıra öhdəliklər götürməkdir. Ən ağır öhdəlik isə Krımın və Şərqi Ukraynanın itirilməsi ilə barışmaqdır ki, bu da Ukrayna üçün ən fəlakətli ssenarinin başlanğıcı ola bilər".
Politoloq, hazırda masada ən çox müzakirə olunan məsələnin atəşkəsin təmin olunması və müharibənin tamamilə sona çatdırılması olduğunu vurğulayıb: "Bunun ilkin şərti kimi Krım və Şərqi Ukraynanın güzəştə getməsi ilə bağlı fikirlər səsləndirilir ki, bunlar Ukraynanın maraqlarına zidd addımlardır. Bu baxımdan müharibənin uzanması və üç ildən artıqdır hərbi əməliyyatların intensiv şəkildə davam etməsi qaçılmaz olur ".
Sonda A.Qurbanova yaxın perspektivdə iki dövlət arasında sülh müqaviləsinin imzalanması və ya hər hansı formada atəşkəsin əldə olunması ehtimalının kifayət qədər zəif göründüyünü bildirib: "Lakin ən azından ilkin atəşkəs şərtlərinin müzakirəsi və qismən qəbul edilməsi Ukraynanın gələcəyi üçün zəruridir. Uzun müddət davam edən hərbi əməliyyatlar Ukraynanın bütün resurslarını tükədib və mövcud dəstək yalnız maliyyə və hərbi sahələrdədir. İnsan resursları və ideoloji davamlılıq baxımından isə Ukraynanın müəyyən müddətə qısa fasiləyə ehtiyacı var".
Pərvin Hacıyeva
15:29 04.09.2025
Oxunuş sayı: 15589
