Azərbaycan və Çin mediası arasında əlaqələr güclənir: Təlim proqramları, staj mübadiləsi...
Azərbaycan Respublikasının Medianın İnkişafı Agentliyi (MEDİA) ilə Çin Xalq Respublikasının "Sinxua" Xəbər Agentliyi arasında media sahəsində əməkdaşlıq haqqında Anlaşma Memorandumu imzalanıb.
Bildirilib ki, Anlaşma Memorandumunun məqsədi iki ölkə arasında media sahəsində qarşılıqlılıq prinsipinə və qarşılıqlı faydaya əsaslanan əməkdaşlığın möhkəmləndirilməsi, təşviqi və inkişaf etdirilməsidir.
Sənəd informasiya və təcrübə mübadiləsini, ortaq maraq doğuran layihələr üzrə birgə fəaliyyəti, eyni zamanda, iclas, seminar, praktiki məşğələ, təlim, konfrans və digər bu kimitədbirlərin təşkili, media sahəsinə məsul rəsmi şəxslərin və müvafiq ekspertlərin səfərlərinin dəstəklənməsini nəzərdə tutur. Təbii ki bu sənəd özlüyündə Azərbaycan mətbuatı üçün müəyyən üstünlükləri və faydaları olacaqdır. Maraqlıdır bəs bu əməkdaşlıq memorandumunun hansı üstünlükləri var və bu biz im mətbuatımıza nələr qazandıracaq?
Media sahəsində ikitərəfli əlaqələrdə bağlı Crossmedia.az-a danışan Əməkdar jurnalist, BDU-nun Jurnalistika fakültəsinin müəllimi Namiq Əhmədov Anlaşma Memorandumunun imzalanması müasir dövrdə ölkəmiz üçün mühüm strateji əhəmiyyət kəsb etdiyini və altı əsas üstünlüyünün olduğunu qeyd edib: “Azərbaycan Respublikasının Medianın İnkişafı Agentliyi (MEDİA) ilə Çin Xalq Respublikasının “Sinxua” Xəbər Agentliyi arasında media sahəsində əməkdaşlıq haqqında Anlaşma Memorandumunun imzalanması müasir dövrdə ölkəmiz üçün mühüm strateji əhəmiyyət kəsb edir. Bu sənəd yalnız informasiya mübadiləsini deyil, həm də siyasi, iqtisadi və mədəni əlaqələrin möhkəmlənməsini nəzərdə tutur. Memorandumun əsas üstünlüklərini aşağıdakı kimi qruplaşdırmaq olar. Birincisi, informasiya mübadiləsinin genişlənməsi təmin ediləcək. Azərbaycan və Çin mediası arasında birbaşa xəbər axını güclənəcək, bu isə ölkəmizin mövqelərinin beynəlxalq informasiya məkanında daha operativ və obyektiv şəkildə təqdim olunmasına şərait yaradacaq. İkincisi, bu sənəd Azərbaycanın beynəlxalq imicinin möhkəmlənməsinə mühüm töhfə verəcək. Xüsusilə “Orta Dəhliz”, Bakı–Tbilisi–Qars dəmir yolu və Zəngəzur dəhlizi kimi regional əhəmiyyətli layihələrin geniş işıqlandırılması ölkəmizin strateji rolunu daha aydın göstərəcək. Üçüncüsü, yeni texnologiyalara çıxış imkanlarının genişlənməsi Azərbaycan mediasına rəqəmsal jurnalistika, süni intellekt və data analitika kimi sahələrdə Çin təcrübəsindən faydalanmaq imkanı yaradacaq. Dördüncüsü, kadr və təcrübə mübadiləsi daha da aktuallaşacaq. Jurnalistlərin təlim proqramlarında, staj mübadiləsində və ortaq layihələrdə iştirakı, eləcə də tələbə mübadiləsi medianın peşəkar potensialını artıracaq. Beşincisi, bu sənəd mədəni diplomatiya və yumşaq güc siyasətinin inkişafına xidmət edəcək. Azərbaycan mədəniyyətinin və dövlət mövqelərinin Çin auditoriyasına daha geniş təqdim olunması, paralel olaraq Çin mədəniyyətinin ölkəmizdə tanıdılması qarşılıqlı anlaşmanı möhkəmləndirəcək. Altıncısı, Memorandumun iqtisadi səmərəsi də diqqətəlayiqdir. Birgə layihələr, sponsorluq təşəbbüsləri, reklam və tanıtım fəaliyyətləri turizm və ticarət əlaqələrinin genişlənməsinə mühüm töhfə verəcək”.
Əməkdar jurnalist, həmçinin Anlaşma Memorandumunu beynəlxalq informasiya məkanında həm Azərbaycanın Çində həm də Çinin Azərbaycanda mövqelerinin güclənməsinə səbəb olacağını bildirib: “Ümumilikdə, MEDİA ilə “Sinxua” Xəbər Agentliyi arasında imzalanmış bu Anlaşma Memorandumu Azərbaycanın beynəlxalq informasiya məkanında mövqelərini gücləndirməyə, Çinin isə Cənubi Qafqaz regionunda media şəbəkəsini genişləndirməyə xidmət edən mühüm strateji addımdır”.
Elmir Heydərli
13:07 01.09.2025
Oxunuş sayı: 6872
