Azərbaycana qarşı kiberhücumlar güclənib: Niyə hər daşın altından Rusiya çıxır?
Milli Məclisin Xarici müdaxilələrə və hibrid təhdidlərə qarşı komissiyası 6 avqust 2025-ci il tarixli açıqlamasının davamı olaraq bildirdi ki, "Facebook" sosial media və sosial şəbəkə platformasının Azərbaycan seqmentində qonşu dövlətlərdən birinin ərazisindən ölkəmizə qarşı aparılan informasiya kampaniyası avqust ayı ərzində davam edib. Dezinformativ xarakterli və təxribatçı fikirləri əks etdirən kampaniya vahid mərkəzdən idarə olunmaqla yeni yaradılmış "Caspian Xəbər", "Caspian Times", "İşıq Media", "Pro Eminent Guild", "Next Azerbaijan" və sair bu kimi səhifələr vasitəsilə həyata keçirilib. Qeyd olunan hücumlar ola bilərmi ki, Rusiya ilə yaşanan münasibətlərə görə şimal qonşumuz tərəfindən həyata keçirilsin və müasir informasiya cəmiyyətində kiberhücumların rolu nədir və hansı təhlükəyə malikdir? Ümumən, bu cür hücumların qarşısını necə almaq olar?
Məsələ ilə bağlı Crossmedia.az-a açıqlama verən media eksperti, professor Qulu Məhərrəmli bu gün dünyada Avropaya və qonşu ölkələrə qarşı ən fəal informasiya kampaniyası aparan ölkələrdən birinin məhz Rusiya olduğunu qeyd edib: “Ukraynada baş verən hadisələr, Qəzzadakı proseslər, Yaxın Şərqdə və Avropada Rusiya-Avropa qarşıdurması, Amerika-Rusiya dialoqları buna bariz nümunədir. Qafqazdan başlayaraq dünyanın müxtəlif bölgələrinə qədər gedən bu proseslər istəyir- istəməz aydın, şəffaf və doğru informasiyanın olmasını tələb edir.
Təəssüf ki, beynəlxalq münasibətlərin mürəkkəb olduğu bu dövrdə dezinformasiya, saxta məlumatlar və baş verən hadisələr haqqında yanlış informasiyalar geniş istifadə olunur. Bunlar həm də qarşı tərəfə psixoloji təzyiq vasitəsi kimi təqdim edilir. Bu baxımdan Rusiya sosial şəbəkələri xüsusilə seçilir. Bu gün dünyada Avropaya və qonşu ölkələrə qarşı ən fəal informasiya kampaniyası aparan ölkə Rusiyadır. Rusiya bunu çox hibrid şəkildə həyata keçirir: həm kütləvi informasiya vasitələri – televiziya, radio, qəzetlər, həm də sosial şəbəkələr vasitəsilə psixoloji müharibəni dərinliklərə qədər aparır. Bu yeni məsələ deyil. 2020-ci ildən sonra Rusiya bu istiqamətdə çox böyük mənfi addımlar atıb".
Müsahibimiz söyləyib ki, Rusiya Avropa ölkələrinə və digər ölkələrə qarşı bütün cəbhə boyu informasiya müharibəsi aparır: "Son bir ayda isə bu kampaniyanın hədəfi Azərbaycan, Ermənistan və ümumiyyətlə Cənubi Qafqaz olub. Azərbaycanda Rusiyanın maraqlarına xidmət edə biləcək heç bir səbəb yoxdur. Rusiya hələ də Cənubi Qafqaz ölkələrini öz keçmiş müstəmləkəsi kimi görür və onların xarici siyasətdə Rusiyanın yanında olmasını istəyir. Buna görə də, Vaşinton görüşündən əvvəl və sonra, həm rəsmi qurumlar, həm sosial şəbəkələrdəki istifadəçilər Azərbaycana qarşı fəal hücuma keçiblər. Azərbaycanın maraqlarını qoruyan platformalar mövcuddur və orada həqiqət olduğu kimi çatdırılır, amma geniş ictimaiyyət üçün bu səs kifayət qədər güclü deyil".
Professor bu cür hücumların qarşısını almağın yolu kimi ən yaxşı müdafiənin elə hücum olduğunu bildirib: “Hadisələr və yayılan xəbərlər çox sürətlə dəyişir, onları sadəcə çatdırmaq və təhlil etmək çətinləşir. Bu baxımdan, ən yaxşı müdafiə hücumdur. Azərbaycan sosial şəbəkəsi də Rusiyaya qarşı əks cavablar verir, rəsmi qurumlar da müəyyən addımlar atır. Bu, müsbət tendensiyadır. Ən yaxşı variant isə hadisələrin yumşalma anından istifadə edərək resursları mənasız xərcləməməkdir. Ayrı-ayrı sosial şəbəkələrdə maraqlı təşəbbüslər olsa da, hadisələrin yumşalmaya doğru getməsi daha önəmlidir”.
Elmir Heydərli
15:50 29.08.2025
Oxunuş sayı: 7098
