Fransada korrupsiya və rüşvətxorluğun başında prezident dayanır -AÇIQLAMA
Fransa prezidenti Emmanuel Makron və həyat yoldaşı Bricit Makronun şimal bölgəsində, Le-Tuke kommunasında villa aldıqları iddia olunur. Fransanın “Le Figaro” nəşrinə istinadən yayılan xəbərə görə, söhbət 111 kvadratmetr sahəyə malik üçmərtəbəli kərpic evdən gedir. 290 kvadratmetrlik torpaq sahəsində yerləşən villanın həyətyanı sahəsində bağ və çardaq mövcuddur. Evin yerləşdiyi ərazi isə La-Manş sahilinə yaxınlığı ilə diqqət çəkir.
Mövzu ilə bağlı Crossmedia.az-a danışan politoloq Əliqismət Bədəlov bildirib: “Fransa gündəmini korrupsiya, rüşvətxorluq, iqtisadi cinayətkarlıq, maliyyə fırıldaqları və digər qalmaqallar zəbt edib. Hazırda Makron hökuməti Fransa tarixində ən korrupsiyaya meyilli və yarıtmaz hakimiyyət kimi qəbul olunur. Əsas səbəblərdən biri Emmanuel Makronun qeyri-ciddi imic qazanması ilə əlaqədardır. Belə ki, dövlət başçısının rəsmi dövlət səfəri zamanı təyyarədən enərkən ictimaiyyətin gözü qarşısında həyat yoldaşı tərəfindən şillələnməsi onun qeyri-ciddi dövlət başçısı olduğunu göstərir”.
Politoloq qeyd edib ki, “Belə bir şəxsin rəhbərlik etdiyi ölkədə rüşvətxorluq və korrupsiya halları adi hala çevrilib. Təbii ki, belə xoşagəlməz hallar ölkədə vətəndaş cəmiyyətinin və ictimaiyyətin diqqətindən yayınmır. Müxtəlif korrupsiya məsələlərindən adı hallanan şəxslərin başında Makron dayanır və həbs olunan korrupsionerlərin onun təsiri ilə azadlığa çıxması Fransa hüquq mühafizə institutları tərəfindən birmənalı qarşılanmır. Bu hal Fransa prezidentinin korrupsionerləri qoruması kimi qiymətləndirilir”.
Daha sonra o, əlavə edib: “Belə faktları çox göstərmək olar. Məsələn, Fransa prezidentinin adı korrupsiya qalmaqallarında çəkilən 70 yaşlı şəxslə bağlı bəraət qərarının çıxarılması ölkədə birmənalı qarşılanmayıb. Mərkəzi partiyanın rəhbəri Makronla bir korrupsiyada adı çəkilir. Bu şəxs 2007-ci ildə Makronun hakimiyyətə gəlməsində əvəzsiz rol oynamış və öz namizədliyini onun xeyrinə geri götürmüşdü. Onun adı çirkli əməllərdə hallanır”.
Politoloq bildirib ki, buna görə dəfələrlə Makron komandasındakı şəxslərin adları korrupsiya əməllərində hallanıb: "Mediada bu barədə geniş məqalələr dərc olunub. Son dövrlər Amerika məşhur şirkətlərinin Fransada tenderləri rahatlıqla qazanmasının arxasında da Makronun məkrli niyyətlərinin durduğu yerli mətbuatda əks-səda doğurub. Bütün bunlar Makronun həyata keçirdiyi daxili və xarici siyasətlə bağlı korrupsiya əməllərindən xəbər verir”.
Ə.Bədəlov vurğulayıb: “Yerli media və siyasi dairələr rüşvət, korrupsiya və iqtisadi cinayətkarları Makron hakimiyyətini xarakterizə edən əsas cəhətlər kimi vurğulayır. Makronun göstərişi ilə ötən illərdə keçmiş xunta rejiminə humanitar yardım adı ilə maxinasiya edən Paris merinin adı indi də rüşvətdə hallanır. Bu məsələ o qədər geniş şəkildə ictimailəşdi ki, Paris jandarması onun evində axtarış aparmalı oldu”.
Politoloq bildirib ki, son zamanlar ölkə daxili etiraz aksiyaları daha da artıb: "Faktiki olaraq hər həftə, demək olar ki, hər gün Makronun idarə etdiyi ölkədə qalmaqal, etiraz aksiyaları və mitinqlər keçirilir. Bunlara səbəb Makronun korrupsiya iddiaları, xarici siyasətdə uyğunsuzluqları və işğalçılıq siyasətindən əl çəkməməsidir. Fransa ictimaiyyəti hazırkı hökuməti ölkə tarixində ən korrupsiyaya meyilli hakimiyyət kimi tanıyır”.
O əlavə edib ki, ümumiyyətlə, Makronun mayası sanki korrupsiya və rüşvətxorluqdan ibarətdir: "Onun seçki kampaniyalarında maliyyə saxtakarlıqlarına şərait yaratması və bu yolla seçkilərdə qalib gəlməsi hər kəsə bəllidir. Fransa mətbuatı bu haqda dəfələrlə məqalələr dərc edib. Hüquq mühafizə orqanlarının araşdırmalarına görə, Makronun seçki kampaniyaları dövründə ABŞ şirkətlərindən birində qeyri-qanuni maliyyə alıb”.
Politoloqun sözlərinə görə Makronun korrupsiya qalmaqallarında erməni lobbisi ilə iş birliyi də mövcuddur: "Prezidentin Amerikanın Buber şirkəti ilə gizli razılaşması barədə Fransa parlamentinin komissiyasının hesabatında məlumat yayılıb. Ümumiyyətlə, Makronun və onun ailəsinin keçmişi ilə bağlı ortaya çıxan faktlar onun əsil simasının korrupsiya və rüşvətxorluğa meyilli olduğunu, pul müqavilələrində siyasi və iqtisadi sövdələşmələr etdiyini göstərir”.
Ə.Bədəlov yekun olaraq bildirib: “Bütün bunlar bir daha təsdiqləyir ki, Fransa dövlətinin həmişə əlində bayraq kimi dalğalandırdığı azad rəqabət mövqeyi, azad bazar iqtisadiyyatı və digər şüarlar sadəcə boş sözlərdən ibarətdir. Əməldə isə korrupsiya və rüşvətxorluq dayanır. Bütün bunların başında Emmanuel Makron və onun ailə üzvləri dayanır. Ölkədə yaradılmış cəzasızlıq mühiti Fransa prezidentini yeni korrupsiya əməlləri törətməyə sövq edir”.
Mehriban Yariyeva
10:27 28.08.2025
Oxunuş sayı: 951
