Gündəm,Avropa

"Zəlzələ olur, daşqın olur, biz çalışırıq ki, insanlara əlimizi uzadaq, kömək edək..." - Deputat

Ukrayna Prezidenti Volodimir Zelenski Azərbaycana göstərilən dəstəyə görə təşəkkürünü bildirib. O, öz “X” sosial şəbəkə hesabında paylaşım edərək, Azərbaycan Prezidenti İlham Əliyevin Müstəqillik Günü münasibətilə etdiyi təbrikləri və Ukraynaya olan hörmətini yüksək qiymətləndirdiyini vurğulayıb. Zelenski həmçinin Ukrayna və Azərbaycan arasındakı strateji tərəfdaşlığın gücləndirilməsinə ümidvar olduğunu bildirib.

Mövzu ilə bağlı Crossmedia.az-a açıqlama verən Milli Məclisin deputatı Aqil Abbas qeyd edib ki, Azərbaycan humanist bir dövlətdir: “Zəlzələ olur, daşqın olur, biz çalışırıq ki, insanlara əlimizi uzadaq, kömək edək, pis vəziyyətdə qoymayaq. Ukraynada bir tərəfdən müharibə gedir, digər tərəfdən insanlar qıtlıq çəkir, enerji problemi yaşanır. Biz köməyimizi insanlıq prinsiplərinə və beynəlxalq qanunlara uyğun olaraq göstəririk. Xarici siyasətimiz insanların yanında olmaqdır. Türkiyədə baş verən zəlzələdə də yardım etdik. Özümüzün bir çox problemlərimiz olmasına baxmayaraq, Türkiyədə şəhər tikdik. Bu, prezidentimizin və dövlətimizin siyasətidir – humanist olmaq, insanlara dəstək göstərmək".