Moskva istədiyinə nail olur: Rusiya "böyük şahmat taxtasında" qalib gəlir
Ukrayna Prezidenti ofisinin müavini İqor Jovkva "Rada" telekanalına müsahibəsində bildirib ki, Kiyev Moskva ilə sülh məsələlərinin müzakirəsini təhlükəsizlik zəmanətləri müəyyən olunana qədər mənasız hesab edir.
"Təhlükəsizlik zəmanətləri olmadan, Avropa və ABŞ-dəki tərəfdaşlarımız tərəfindən Ukrayna və bütün Avropa qitəsi üçün bu zəmanətlərin nə olduğunu aydın başa düşmədən, hamının danışdığı davamlı sülhün qurulması üçün danışıqlar prosesi çərçivəsində digər məsələlər barədə danışmağın mənası yoxdur", - deyə o bildirib.
O həmçinin vurğulayıb ki, Kiyevə verilən zəmanətlər həm hərbi, həm də siyasi xarakter daşımalıdır, buraya Ukraynanın indiki sayda ordusunu saxlaması və respublikanın Avropa İttifaqına üzvlüyü də daxildir.
Jovkvanın səsləndirdiyi fikirlər barədə Crossmedia.az-a danışan hərbi ekspert Şair Ramaldanov bildirib ki, müharibənin taleyini yalnız ərazi məsələsi deyil, həm də digər siyasi və təhlükəsizlik tələbləri də müəyyən edir: "Bu, yalnız ərazi məsələsi ilə məhdudlaşmır. Rusiyanın şərtlərində ərazi məsələsi əsas bəndlərdən biridir. Lakin bundan əlavə digər tələblər də mövcuddur. Düşünürəm ki, Rusiya bu məsələlərdə istədiyinə nail ola bilməsə, sülh müqaviləsinin imzalanması da mümkünsüz olacaq. Əlbəttə, Ukrayna üçün bütün şərtlər içərisində ən ağırı ərazi məsələsidir, çünki torpaqların itirilməsindən daha ağır heç nə ola bilməz".
Ekspert Rusiyanın hazırkı üstünlüyünün ona bu əraziləri qanuniləşdirmək planını reallaşdırmaq imkanı yarada bilə cəyini qeyd edib: "Hazırda Rusiya bu ərazilərin itirilməsini qanuniləşdirmək niyyətindədir. Əgər bunu həyata keçirsə, məncə, Moskva istədiyinə müəyyən qədər nail ola biləcək. Bunun baş vermə ehtimalı daha yüksəkdir, çünki cəbhədəki vəziyyət hazırda Rusiyanın xeyrinədir".
Ş.Ramaldanov ABŞ-nin mövqeyinin açıq ifadəsinin Rusiyanın sərt siyasətini gücləndirən amillərdən birinə çevrildiyini vurğulayıb: "Digər tərəfdən, ABŞ ilə aparılan danışıqlarda da bu məsələlərə müəyyən anlayışla yanaşıldığı görünür. Bu isə Rusiyanın daha da qətiyyətli mövqe sərgiləməsinə imkan yaradır. Artıq Avropa İttifaqının əsas oyunçuları ilə keçirilən görüşlərdə də ABŞ Prezidenti bu məsələdə öz mövqeyini açıq şəkildə ifadə edib".
Fatimə Nəbiyeva
15:06 21.08.2025
Oxunuş sayı: 10539
