Cevdet Yılmazdan mühüm mesaj: Türkiyə Rusiya- Ukrayna savaşı ilə hansı addımı atacaq?
Türkiyənin vitse-prezidenti Cevdet Yılmaz ABŞ Prezidenti Donald Tramp və Ukrayna lideri Volodimir Zelenski arasında keçiriləcək görüşlərdən əvvəl ölkə rəhbəri Rəcəb Tayyib Ərdoğanın adından “Könüllülər Koalisiyası”nın onlayn liderlər toplantısında iştirak edib. Görüş zamanı C.Yılmaz Türkiyə sülhün təmin olunması üçün hər cür töhfəni verməyə hazır olduğunu qeyd edib. Ümumən isə Rusiya – Ukrayna müharibəsi başlayandan Türkiyə öz fəallığı ilə seçilən dövlətlərdən biri olub. Maraqlıdır hazırki vəziyyətdə Türkiyə bu məsələdə hansı rolu icra edə bilər?
Bu barədə Crossmedia.az-a açıqlama verən politoloq Aytən Qurbanova müharibənin ilk günündən etibarən Türkiyənin bu prosesdə ən fəal dövlətlərdən biri kimi çıxış etdiyini və müxtəlif təşəbbüslərlə beynəlxalq gündəmdə önəmli rol oynadığını qeyd edib: “Rusiya–Ukrayna müharibəsinin ilk günündən etibarən Türkiyə bu prosesdə ən fəal dövlətlərdən biri kimi çıxış etmiş və müxtəlif təşəbbüslərlə beynəlxalq gündəmdə önəmli rol oynamışdır. Xüsusilə Türkiyənin vasitəçiliyi ilə keçirilən görüşlərdə müəyyən nəticələrin əldə olunması bu ölkənin sülh prosesinə real töhfə vermək imkanlarını ortaya qoyur. İstanbulda keçirilmiş bir neçə raund danışıqlar zamanı əldə olunmuş humanitar razılaşmalar, əsirlərin və girovların mübadiləsi ilə bağlı nəticələrin icrası göstərir ki, Türkiyənin təşəbbüsləri həqiqətən də Rusiya–Ukrayna müharibəsinin həlli istiqamətində müsbət dinamika yarada bilər.Bununla yanaşı, ABŞ Prezidenti Donald Tramp ilə Ukrayna Prezidenti Volodimir Zelenskinin gözlənilən görüşü öncəsi Türkiyənin prosesə töhfə verməyə hazır olduğunu bəyan etməsi onu göstərir ki, Ankara münaqişənin sülh yolu ilə həlli, atəşkəsin əldə olunması və ümumilikdə müharibənin dayandırılması məsələsində ciddi maraq nümayiş etdirir. Bu kontekstdə Türkiyə Prezidenti cənab Rəcəb Tayyib Ərdoğanla həm Rusiya Prezidenti Vladimir Putin, həm də Ukrayna Prezidenti Volodimir Zelenski arasında mövcud olan şəxsi münasibətlər və etimad amili dialoqun davam etdirilməsi baxımından mühüm üstünlüklər yaradır və Türkiyənin təşəbbüslərini daha da ön plana çıxarır".
Politoloqun fikrincə, həm ABŞ-nin iştirakı ilə üçtərəfli formatda, həm də ikitərəfli görüşlərdə Türkiyə effektiv bir platforma rolunu oynaya bilər: "Eyni zamanda, sülh gündəliyinin müəyyənləşdirilməsi, Ukraynanın mövqelərinin müdafiəsi və ərazi bütövlüyünün qorunması məsələlərinin müzakirəsi istiqamətində Türkiyənin dəstəyi olduqca önəmlidir. Çünki mediada yayılan bəzi məlumatlar Vladimir Putinlə Donald Tramp arasında keçirilən görüşlərdə Ukraynanın ərazi bütövlüyü ilə bağlı məsələlərin kifayət qədər diqqətə alınmadığını, əksinə, ərazi güzəştlərinin gündəmə gətirildiyini göstərir”.
O, hazırki vəziyyətdə Ukraynanın birbaşa iştirakı ilə yeni bir görüşün təşkili və ədalətli nəticələrin əldə olunması zəruri olduğunu qeyd edib: "“Belə olan halda Ukraynanın birbaşa iştirakı ilə yeni bir görüşün təşkili və ədalətli nəticələrin əldə olunması zəruridir. Şübhəsiz ki, bu istiqamətdə keçiriləcək mümkün danışıqlarda Türkiyə həm təcrübəsi, həm xoş niyyəti, həm də beynəlxalq hüquqa əsaslanan mövqeyi ilə seçilərək, həm Ukraynanın maraqlarının müdafiəsinə, həm də ümumilikdə ədalətin təmin olunmasına töhfə verə biləcək azsaylı dövlətlərdən biri kimi ön plana çıxır”.
Elmir Heydərli
15:37 18.08.2025
Oxunuş sayı: 15831
