ABŞ-dən Ukrayna ilə bağlı mühüm qərar: Rusiyaya jest, yoxsa...?
ABŞ-ın vitse-prezidenti Cey Di Vens Fox News-a müsahibəsində deyib ki, Vaşinqton daha Ukraynadakı münaqişəni maliyyələşdirməyəcək.
O, bildirib ki, Vaşinqton bu məsələnin sülh yolu ilə həllinə nail olmaq istəyir:
“Əgər avropalılar təşəbbüsü üzərilərinə götürüb Amerika istehsalçılarından silah almaq istəyirlərsə, ABŞ buna qarşı deyil, lakin artıq bunu maliyyələşdirməyəcək”.
ABŞ-ın vitse-prezidentinin dediyinə görə, Tramp əmindir ki, Alyaskada Putinlə keçiriləcək görüş görülən səylərə dəyər:
“Bu danışıqlar Amerika diplomatiyası üçün əhəmiyyətli irəliləyişdir. ABŞ hazırda Putinin və Zelenskinin bir masa arxasında əyləşərək münaqişənin dayandırılmasını müzakirə edə biləcəyi vaxtı razılaşdırma prosesindədir. Vaşinqton Ukraynadakı münaqişənin mövcud təmas xəttini nəzərə alaraq həllinə çalışır”.
O, eyni zamanda qeyd edib ki, Tramp, Çin Xalq Respublikasının Rusiya nefti almasına görə gömrük rüsumları tətbiq etməyi düşünür, lakin hələlik yekun qərar verilməyib.
Rusiya - Ukrayna müharibəsinin bitməsi üçün Ağ Ev, demək olar, bütün imkanlardan istifadə edir. Bir çoxunun fikirncə, müharibənin maliyyələşdirməsinin dayandırılması da birbaşa olaraq savaşın dayandırılmasına hesabanıb.
Vaşinqtonun yeni qərarını Crossmedia.az-a şərh edən politoloq Samir Hümbətov isə sözlərinə görə, ABŞ-nin Ukraynadakı münaqişəni tamamilə maliyyələşdirməsini dayandırdığını demək doğru deyil: "Prezidenti Donald Tramp bildirib ki, Avropa hələ də Ukraynanı maliyyələşdirir və silah tədarükünü davam etdirir. Həmçinin ABŞ-dən də dəstək var. Bu dəstəyin davam etməsinin əsas səbəblərindən biri Ukraynadakı mədənlərin işlənməsi ilə bağlı əldə olunan razılıqdır. Oradan gələcək gəlirlərin böyük bir hissəsi, ən azı 10 il ərzində, Ukraynanın dirçəlməsinə yönəldiləcək. Beləliklə, ABŞ-nin dəstəyi davam edir".
Politoloqun fikrincə, ABŞ-nin maliyyə dəstəyini azaltması eyni zamanda Rusiya Prezidenti Vladimir Putinin görüşü öncəsi bir jest kimi də qiymətləndirilə bilər: "Lakin ABŞ maliyyələşməni tamamilə dayandırmayacaq. Əgər hansısa məsələdə razılıq əldə olunmasa və Putin bu razılığa gəlməsə, Tramp maliyyəni daha çox ayırmaq ehtimalını artıracaq. Müxtəlif ehtimallar var. Bu, ola bilsin, Trampın Putinə jestidir. Bəlkə də, o demək istəyib ki, mən maliyyəni azaldıram, siz müharibəni dayandırın. Əgər Putin bununla razılaşmasa, maliyyələşmə davam edəcək".
Mehriban Yariyeva
15:02 11.08.2025
Oxunuş sayı: 1418
