Rusiya və ABŞ qarşı- qarşıya: Üçüncü dünya müharibə başlaya bilər
ABŞ Prezidenti Donald Tramp və Rusiya lideri Vladimir Putinin Alyaskada keçiriləcək mümkün görüşü dünya ictimaiyyətinin diqqət mərkəzindədir. Bu görüşdən gözləntilər çoxsaylı müzakirələrə səbəb olur və ekspertlər müxtəlif fikirlər səsləndirirlər.
Məlum olduğu kimi, Tramp uzun müddətdir ki, Şərqi Avropadakı müharibəni bitirmək üçün çalışır. Bunun üçün həm Rusiya, həm də Ukrayna ilə təmaslar davam edir.
Ağ Ev rəhbəri daha əvvəl danışıqlara başlamaq üçün Kremlə on gün vaxt vermişdi. Bu müddət başa çatıb. Bundan sonra Tramp və Putinin hansı məsələləri müzakirə edəcəkləri müzakirə mövzusudur.
Mövzu ilə bağlı politoloq İlqar Vəlizadə Crossmedia.az-a açıqlama verib. Ekspert bildirib ki, ABŞ prezidenti ilə Putin arasında görüşün mümkün yekunları barədə artıq çoxlu söz-söhbətlər var: "Bir çox ekspert hesab edir ki, danışıqlar nəticəsiz qalacaq. Mən də belə düşünürəm. Danışıqlar uğursuz olsa, münaqişənin daha kəskin və şiddətli fazası başlayacaq. Bu, dünya üçün ciddi qlobal təhlükələr yarada bilər. Əgər tərəflər razılığa gəlməsələr, qarşıdurma birbaşa ABŞ ilə Rusiya arasında olacaq. Bu, üçüncü dünya müharibəsinin daha da yaxınlaşması deməkdir".
Müsahibimiz söyləyib ki, az olsa ümidlər var: "Putin anlayır ki, ABŞ-la birbaşa qarşıdurma ciddi risklər daşıyır və digər ölkələr də bu vəziyyəti dəstəkləməyəcək. ABŞ-nin təklifləri Rusiya üçün o qədər də çətin deyil. Çünki ABŞ Rusiyanın işğal etdiyi Ukrayna ərazilərini Moskvanın nəzarəti altında saxlamaq istəyir ki, bu da böyük bir güzəştdir. Putin təklifi qəbul etməsə, Çin, Hindistan və digər Rusiyanın dostu olan ölkələr də bu mövqeyi dəstəkləyəcək və günah tamamilə Moskvada olacaq. Ona görə də Rusiya ya ABŞ-nin təkliflərini qəbul etməli, ya da bütün dünya ilə qarşıdurmaya hazır olmalıdır. Nəticə etibarilə, danışıqların tam uğursuzluğundan danışmaq hələ tezdir".
Mehriban Yariyeva
14:36 11.08.2025
Oxunuş sayı: 1425
