Tramp Putinə buna görə əsəbiləşib - Maraqlı iddia
ABŞ Prezidenti Donald Tramp Rusiya- Ukrayna müharibəsi ilə bağlı növbəti dəfə sensasiyalı açıqlama verib. O, bildirib ki, yaxın günlərdə savaş başa çata bilər.
Tramp bu barədə özünün nümayəndəsi Stiven Uitkoff və Rusiya lideri Vladimir Putinlə görüş barədə sosial şəbəkə hesabında yazarkən bildirib.
Ağ Ev rəhbəri əvvəllər də müharibə ilə bağlı dəfələrlə iddialı bəyanatlar səsləndirsə də, onun verdiyi vədlərin, proqnozların bir çoxu özünü doğrultmayıb. Tramp beləliklə, bir növ “yalançı çoban” obrazına düşüb.
Bəs onun bu dəfəki fikirləri nə qədər realdır?
Bu barədə Crossmedia.az-a danışan politoloq Oqtay Qasımov bildirib ki, Trampın bu fikirləri diqqət çəkicidir: “Trampın xüsusi nümayəndəsi uitkoffun Rusiya prezidenti Vladimir Putinlə görüşündən sonra yayılan məlumatlarda da görüşün konstruktiv keçirildiyi bildirilir. Bunlar Trampın Rusiyaya 10 gün vaxt verməsi çərçivəsində baş verir. Hesab edirəm ki, Rusiya apreldən bəri Tramp və Putin arasındakı telefon danışığından sonra Ukraynaya dron və raket hücumlarını intensivləşdirdi. Mülki obyektləri hədəfə aldı, çoxsaylı dinc insan bu hücumların qurbanı oldu. Trampı əsəbiləşdirən də Putinin savaş şərtlərini və prinsiplərini pozaraq mülki əhalini hədəf alması idi”.
Ekspertin sözlərinə görə, əldə olunan razılaşma Ağ Ev rəhbərinin uzun müddətdən bəri israr etdiyi bir aylıq atəşkəslə bağlı olacaq: “Bunun ardınca müəyyən danışıqlar aparıla bilər. Təbii ki, təkcə Rusiyanın deyil, Ukraynanın da maraqları nəzərə alınmalıdır. Çünki düşünürəm ki, ədalətsiz sülh gələcəkdə yeni müharibəyə səbəb ola bilər. Hazırki mərhələdə ən böyük irəliləyiş bir aylıq atəşkəsin əldə olunmasıdır”.
Ayhan
19:04 07.08.2025
Oxunuş sayı: 12553
