Şok proqnoz: " Rusiya yaxın günlərdə daha güclü zərbələr endirəcək, sonra isə..."
ABŞ prezidentinin xüsusi nümayəndəsi Stiv Uitkoffla danışıqlar zamanı Rusiya indi Ukrayna ilə atəşkəs əldə etməyə daha çox meyilli olduğunu göstərib.
Bu barədə Ukrayna Prezidenti Volodimir Zelenski bildirib.
O, Uitkoffun Moskvaya səfərindən sonra ABŞ Prezidenti Donald Trampla danışdığını xatırladıb: “Biz Moskvada deyilənləri müzakirə etdik. Belə görünür ki, Rusiya indi atəşkəsə daha çox meyillidir. Onlara təzyiqlər işləyir. Amma əsas odur ki, bizi və ya aldatmasınlar”, - Zelenski vurğulayıb.
Həmçinin, prezidentin sözlərinə görə, Ukrayna tərəfdaşlarına ümumi mövqe və ümumi baxışı əlaqələndirmək üçün yaxın vaxtlarda təhlükəsizlik üzrə müşavirlərin görüşünü keçirməyi təklif edib.
Bəs, doğrudanmı, Zelenskinin dediyi kimidir, yəni Rusiya atəşkəsə əvvəlkindən daha meyillidir? Əgər belədirsə, deməli, Moskva artıq geri çəkilir. Hərçənd Vaşinqton hələ "Domokl qılıncı"nı qaldırmayıb...
Zelenskinin səsləndirdiyi fikirlər barədə Crossmedia.az-a danışan hərbi ekspert Azad İsazadə hazırda baş verən halların siyasi ritorika, yəni söz oyunu olduğunu qey edib: “Mənə elə gəlir ki, mətbuatda yayımlanan bəyanatlar – istər Zelenskinin açıqlamaları, istərsə də Putinin "atəşkəsə meyilli" olduğu yönündə səsləndirilən fikirlər – daha çox siyasi ritorika, yəni söz oyunu xarakteri daşıyır. Atəşkəsə meyilli olmaq" hələ razılıq vermək demək deyil. Bu ifadə sadəcə müəyyən ehtimalları və açıq qapıları göstərir. Belə hallarda adətən “meyilli” sözündən sonra müəyyən şərtlər də gəlir. Ehtimal etmək olar ki, yaxın günlərdə – xüsusən də avqustun səkkizində Trampın Rusiyaya qarşı hansısa addımlar atacağı gözlənildiyi bir zamanda – Rusiya sadəcə olaraq dialoqa açıq olduğunu nümayiş etdirmək istəyir. Lakin reallıqda Rusiya hələ ki, atəşkəsə tam hazır görünmür. Yəni, hazırda sadəcə nümayiş xarakterli bəyanatlar verilir. Çox güman ki, növbəti mərhələdə rəsmi Moskva öz şərtlərini irəli sürəcək: məsələn, dörd vilayətin verilməsi, Ukrayna ordusunun tərksilah edilməsi, Rusiyaya qarşı təhlükənin aradan qaldırılması və bu kimi sadaladıqlarımız şərtlərin olması istisna deyil”.
Hərbi ekspert, həmçinin Rusiyanın Trampın təziqlərinə görə atəşkəsi dayandırdığını və bunu müvəqqəti hal olduğunu qeyd edib: “Ola bilər ki, ABŞ-dakı siyasi dəyişikliklərin təsiri ilə -Trampın təzyiqləri fonunda- Rusiya müəyyən müddətə Ukraynaya hava zərbələri endirməsin. Lakin bu, o şərtlə baş verə bilər ki, Ukrayna da öz növbəsində Rusiyanın ərazisinə dron hücumlarını dayandırsın. Bu mənzərədə ən yaxşı ehtimal olunan ssenari – yalnız hava məkanında məhdud bir atəşkəs ola bilər. Amma bu da olduqca qeyri-müəyyəndir. Çünki istənilən atəşkəs müddətində tərəflər müvəqqəti fasilədən istifadə edərək bir-birinə maksimum zərbə vurmağa çalışacaqlar. Bu isə yeni razılaşma perspektivlərini daha da çətinləşdirəcək. Hazırkı vəziyyət onu göstərir ki, Rusiya yaxın günlərdə daha güclü zərbələr endirəcək, sonra isə məhdud atəşkəs təklif edə bilər. Lakin bu ehtimala da o qədər inanmıram. Daha çox görünən budur ki, Rusiya sadəcə vaxtı uzatmaq niyyətindədir. Hesab edir ki, hücumları nəticə verir. Halbuki real mənzərə fərqlidir: müəyyən irəliləyişlər olsa da, bu ciddi və strateji dəyişikliklər deyil. Yay aylarında hər hansı real atəşkəsin əldə olunacağına inanmıram. Ola bilsin ki, payızda yağışlar başlayıb, yollar palçıqlı və hücum əməliyyatları üçün əlverişsiz olduqdan sonra tərəflər müəyyən atəşkəs danışıqlarına başlasınlar” .
Elmir Heydərli
14:40 07.08.2025
Oxunuş sayı: 14965
