Rusiya Qərbi kapitulyasiyaya məcbur etmək isrəyir: "Bu şərtlərlə danışıqlar mümkünsüz"
İsrailin Baş naziri Binyamin Netanyahu ABŞ və Rusiya prezidentləri – Donald Tramp və Vladimir Putin arasında artan gərginliyi azaltmaq məqsədilə vasitəçilik missiyası həyata keçirir. Yerli medianın məlumatına görə, Netanyahu iki liderlə həm açıq, həm də məxfi danışıqlar aparır. Bu təşəbbüs Trampın Rusiya ilə bağlı sərt addımlar atmasından və Ukrayna ilə bağlı danışıqlara start verəcəyini açıqlamasından sonra gündəmə gəlib.
Netanyahunun bu cəhdləri İsrailin qlobal diplomatiyada rol oynamaq istədiyini göstərir. O, Vaşinqton və Rusiya arasında körpü qurmağa çalışaraq bölgədəki sabitliyə təsir etmək niyyətindədir.
Baş verənlərlə bağlı Crossmedia.az-a danışan politoloq Elçin Xalidbəyli Rusiyanın irəli sürdüyü şərtləri, Qərb dövlətlərinin qəbul etmə imkanı olmadığını bildirib: “ABŞ və Rusiya arasında münasibətlərin normallaşdırılması üçün böyük ehtimalla vasitəçiliyə ciddi ehtiyac yoxdur. Çünki hər iki ölkənin – həm Rusiyanın, həm də ABŞ-nin – siyasi-diplomatik kanalları bir-biri ilə təmaslar üçün açıqdır. Bunu dəfələrlə hər iki tərəf bəyan edib. ABŞ Prezidentinin xüsusi nümayəndəsi Stiven Vitkov da 8 avqusta qədər Moskvaya səfər etmək niyyətindədir. Bəzi məlumatlara görə, o, artıq Rusiyadadır. Problemlərin və yaxud da ziddiyyətlərin yoluna qoyulması üçün birbaşa təmas və yaxud da amerikalı rəsmi ilə müzakirə aparıb Trampa mesajlar göndərmək imkanları mövcuddur. Belə olan halda başqa bir vasitəçiyə ehtiyac qalmamış olur. Ancaq problem ondan ibarətdir ki, Rusiya, ABŞ-nin, o cümlədən də Prezident Trampın təklif etdiyi sülh və ya atəşkəs anlaşmasına yaxın durmur. Əsas ziddiyyət məsələsi budur. Rusiya sülh anlaşması üçün elə şərtlər irəli sürür ki, bu sənəd imzalansa, bu həm Ukraynanın, həm də NATO üzvü olan Qərb dövlətlərinin bütövlükdə kapitulyasiyası anlamı daşıyar. Qərb Kremlin bu şərtlərini qəbul etmək imkanında deyil. Bu tələblər qəbuledilməzdir. Ona görə də ortada ziddiyyətlər yaranır və bu ziddiyyətləri aradan qaldırmaq hazırda bir qədər çətinləşmiş kimi görünür".
Onun sözlərinə görə, böyük ehtimalla Kremlin indiki mövqeyi şəraitində Avropa və ABŞ arasında ziddiyyətlərin aradan qaldırılması mümkün olmaya bilər: "Nəticədə qarşıdurma daha da dərinləşə bilər. 8 avqustdan sonra ABŞ-nin Rusiyaya qarşı daha sərt, daha radikal addımlar atma ehtimalı inandırıcı görünür. Bu baxımdan, ABŞ ilə Rusiya arasındakı ziddiyyətlərin vasitəçilər üzərindən nizamlana biləcəyi qətiyyən inandırıcı deyil".
Nicat Rüstəmzadə
13:58 06.08.2025
Oxunuş sayı: 13540
