Ekspert: "Ukrayna ən çətin mərhələni geridə qoyub, danışıqlar qaçılmazdır"
Çexiya Prezidenti Petr Pavel bildirib ki, Qərbin hərtərəfli dəstəyinə baxmayaraq, Ukrayna böyük insan itkisi olmadan Rusiyanın işğalındakı əraziləri azad etmək gücündə deyil. O, Rusiyanın sülh arqumentlərini rədd edərək, Moskvanın yalnız Donald Tramp vasitəsilə danışıqlar aparmaq niyyətini Avropanın təhlükəsizliyinə təhdid adlandırıb. Prezidentin fikrincə, Rusiya iqtisadi təzyiqlərə davam gətirə bilməyəcək və nəhayət, danışıqlar masasına əyləşmək məcburiyyətində qalacaq.
P.Pavelin səsləndirdiyi fikirlər barədə Crossmedia.az-a danışan hərbi ekspert Üzeyir Cəfərov bildirib ki, Ukraynanın böyük itkilət vermədən torpaqlarını azad edə bilməyəcəyi məlumdir: "Çünki Ukraynanın əraziləri çox böyükdür və Rusiya həm 2022-ci ildə, yəni müharibənin ilk illərində, həm də son bir neçə ayda Donetsk istiqamətində bəzi əraziləri tutub. Əlbəttə ki, Ukrayna bu əraziləri azad edəcək. Buna heç kimin şübhəsi olmasın. Mən şəxsən Ukrayna xalqının qətiyyətini, necə deyərlər, əzmkarlığını bilən bir şəxs kimi deyirəm ki, Ukrayna öz ərazilərini mütləq azad edəcək".
Onun sözlərinə görə, Ukraynanın Rusiyaya ərazi güzəşti etməsi mümkünsüzdür: "Çexiya prezidenti generaldır. Başa düşürəm, o, hərbi nöqteyi-nəzərdən indiki vəziyyətdə deyir ki, Ukrayna böyük itkilər vermədən əraziləri azad etmək gücündə deyil. Amma Ukrayna ordusu hazırlaşır, güclənir və bu əraziləri mütləq şəkildə azad edəcək. Bizə də Qarabağla bağlı eyni vəziyyət izah olunurdu ki, hərbi yolla bu əraziləri azad etmək mümkün deyil və Azərbaycan bu torpaqlardan imtina etməlidir. Mən elə düşünmürdüm, optimist idim. Və, bu özünü təsdiqlədi. 1994-cü il mayın 12-də atəşkəs haqqında razılıq imzalandı, Azərbaycan ordusu gücləndi, hazırlandı, təlimlər keçdi, müasir silahlar aldı”.
O qeyd edib ki, bu gün Ukrayna müasir silahlarla təmin olunur və hətta yerli istehsal imkanlarını genişləndirir: “Bu gün Ukrayna ən müasir silah və sursat alır. Hətta artıq Yaponiya ilə birgə dron istehsalını həyata keçirməyə hazırlaşır və yəqin ki, yaxın günlərdə bu proses reallaşacaq. Ona görə də ABŞ Prezidenti Donald Trampın iştirakı ilə danışıqlarda ərazilərin bağışlanması və yaxud da itirilməsi kimi məsələlər mümkün deyil. Ukrayna artıq ən çətin mərhələni geridə qoyub. 2022-ci ildə Ukrayna bu vəziyyətdə deyildi — bu cür silah-sursatı, bu cür imkanları yox idi. Artıq bu gün Ukrayna özü də gözəl başa düşür ki, ən müasir silahlarla Rusiyanın işğalçı siyasətinin qarşısını almaq gücündədir. Hazırda Ukrayna daxili imkanları hesabına ordusunun tələbatının 50 faizini ödəyir: silah-sursat, mərmilər, texnika və s. Odur ki, danışıqlar qaçılmazdır. Kremldən açıqlmama verilib ki, belə bir görüşə hazırlıq getməlidir. Aydındır Moskva Trampın danışıqlara başlamaq üçün "son tarix" kimi qoyduğu avqustun səkkizindən narahatdırlar. Mütləq danışıqlar olacaq. Ümumiyyətlə, istənilən savaşlar sonda danışıqlarla bitir. Bu nöqteyi-nəzərdən düşünürəm ki, danışıqlar yolu ilə atəşkəs əldə olunacaq və atəşkəsdən sonra tərəflər müəyyən razılığa gələ biləcəklər. Yaxın vaxtlarda Ukrayna nümayəndə heyətlərinin görüşləri davam edəcək, bu və ya digər formatda — məsələn, İstanbul formatında. Amma mən Uktayna dövlət başçısı Volodimir Zelenski ilə rusiyalı həmkarı Vladimir Putinin yaxın vaxtlarda birbaşa görüşünün baş tutacağını gözləmirəm”.
Mehriban Yariyeva
13:25 05.08.2025
Oxunuş sayı: 4644
