Vəziyyət nəzarətdən çıxır: "ABŞ da, Rusiya da "qırmızı xətləri" keçir"
ABŞ-nin NATO-dakı daimi nümayəndəsi Metyu Uitaker NBC-yə müsahibəsində deyib ki, Ağ Ev rəhbəri Donald Trampın xüsusi nümayəndəsi Stiven Uitkoff bu həftə sonu Rusiyaya səfər edəcək.
O qeyd edib ki, Uitkoffun bu səfəri ilə Rusiya-Ukrayna münaqişəsində irəliləyiş əldə edilə bilər.
Səfərdən gözlənilən nəticə barədə Crossmedia.az-la fikirlərini bölüşən politoloq Elçin Xalidbəyli Rusiyanın neo-imperialist mövqeyi danışıqların reallaşmağına əngəl olduğunu qeyd edib: ""Kreml aqressiv davranış sərgiləməklə, ABŞ-a, o cümlədən Prezident Donald Trampın beynəlxalq nüfuzuna qarşı hücuma keçmişdir. Çünki Tramp Ukraynadakı müharibəyə mümkün qədər tez son qoyacağına söz vermişdi. Lakin Rusiyanın neo-imperialist mövqeyi bu vədlərin reallaşmasına imkan vermədi. Tramp Rusiyanın Ukraynaya müdaxiləsinin qarşısını almaq məqsədilə genişmiqyaslı planlar irəli sürmüşdü. Ancaq bu yanaşma Moskvanı daha da aqressivləşdirdi və Ukraynanı tam ələ keçirmək niyyətini gücləndirdi. Bu səbəbdən danışıqlar dayandırıldı. Hazırda ABŞ Rusiya ilə daha sərt və Kremli "anlayacağı dildə" danışmaqla müzakirələri davam etdirməyə çalışır. Avqustun səkkizində Rusiyaya verilmiş sülh və ya atəşkəslə bağlı vaxt məhdudiyyəti başa çatacaq. Bu tarix ərəfəsində ABŞ nümayəndəsinin Moskvaya səfər edəcəyi və danışıqlar üçün son şansı təqdim edəcəyi gözlənilir".
Politoloq,həmçinin əgər razılaşma əldə olunmazsa Rusiya və onun müttəfiqlərinin sarsıdıcı sanksiyalar ilə üzləşəcəyini qeyd edib: "Proqnozlara görə, avqustun səkkizində və ümumilikdə ayın sonuna qədər müəyyən razılaşma əldə oluna və Rusiya atəşkəsə razılıq verə bilər. Lakin bu ümidlər inandırıcı görünmür. Çünki Rusiya xarici ölkələrin ərazilərinə və təbii resurslarına müdaxilə etmək ambisiyasını davam etdirən neo-imperialist dövlətdir. Böyük ehtimalla, Trampın Moskvaya səfəri real nəticə verməyəcək. Bu halda avqustun səkkizindən sonra ABŞ Rusiyaya qarşı sanksiyalar tətbiq etməyə məcbur qalacaq. Həmin sanksiyalar yalnız Rusiyanı deyil, onunla iqtisadi və ticarət əlaqələrində olan dövlətləri də əhatə edəcək. Bu, Rusiyanın iqtisadi, siyasi və ticarət sahəsində ciddi təcridinə gətirib çıxaracaq. Rusiya iqtisadiyyatı yalnız daxili bazar çərçivəsində fəaliyyət göstərməyə məhkum ediləcək. Həmçinin Rusiya bankları qlobal maliyyə sistemindən tamamilə təcrid olunacaq. Bununla yanaşı, Rusiya ilə əməkdaşlıq edən tərəfdaş dövlətlər də eyni iqtisadi sanksiyalara məruz qalacaqlar. Bu isə bəzi ölkələrin Rusiya ilə ticarət əlaqələrindən geri çəkilməsinə səbəb olacaq. Digər tərəfdən, Tramp Ukraynaya ən müasir ABŞ silahlarının veriləcəyinə söz vermişdi. Bu silahlar vasitəsilə Rusiyanın müttəfiqlərinə ciddi zərbələrin endirilməsi planlaşdırılır. Əgər bu zərbələr Rusiyanı çətin vəziyyətə salarsa, o zaman Kremli danışıqlar masasına oturtmaq mümkün ola bilər".
Müsahibimizin fikrincə, proses Rusiyaya qarşı sərt qarşıdurmaya istiqamətlənmişdir: "Trampın təhdidlərinə cavab olaraq, ABŞ-nin iki hərbi gəmisini Rusiyanın sahil sularına göndərməsi də Kremldə ciddi siqnal kimi qiymətləndirilir. Bu isə ABŞ-nin artıq Rusiya ilə dəniz qarşıdurmasına hazır olduğunun göstəricisidir. Beləliklə, vəziyyət nəzarətdən çıxmaq üzrədir. Hər iki tərəf artıq "qırmızı xətləri" keçib. Bu səbəbdən Rusiya ilə ABŞ arasında razılaşma ehtimalı, demək olar ki, mövcud deyil. Bu da Ukrayna ilə müharibənin uzunmüddətli xarakter alacağını göstərir. Mövcud vəziyyətdə Rusiya daha çətin və itkilərlə dolu bir mərhələyə qədəm qoyacaq".
Elmir Heydərli
15:41 04.08.2025
Oxunuş sayı: 1242
