Britaniyadan ABŞ-yə "Gör, fələk nə sayır" mesajı: "Zelenski hakimiyyətdən gedəcək, sonra isə..."
Böyük Britaniyanın xarici işlər
naziri Devid Lemmi Ukraynadakı münaqişənin yaxın bir il ərzində həll
olunmasının real görünmədiyini bildirib. Onun sözlərinə görə, danışıqlar
prosesi davam edəcək, lakin bu prosesin uğuru birbaşa Rusiyanın danışıqlara nə
dərəcədə ciddi yanaşmasından asılı olacaq.
Məlum olduğu kimi, Şərqi Avropadakı
savaş artıq üç ildir ki, davam edir. ABŞ bütün imkanları ilə tərəflərin mövqelərini
yaxınlaşdırıb, sülhün ən yaxın zamanda əldə olunmasına çalışsa da, hələ ki buna
nail ola bilmir. Ağ Ev rəhbəri Donald
Tramp Rusiyaya danışıqlara başlamaq üçün on gün vaxt vermişdi. Bir neçə gündən
sonra onun Moskvaya verdiyi vaxt tamam olacaq. Britaniyalı nazirin dedikləri isə
təxminən belə başa düşülməlidir: “ABŞ, sən saydığını say, gör fələk nə sayır”.
Beynəlxalq münasibətlər üzrə ekspert
Əziz Əlibəyli Crossmedia.az-a “fələyin nə saydığı” sualına belə cavab verdi: “Hazırkı
vəziyyətdə münaqişənin yaxın zamanda həlli real görünmür. Rusiyaya qalib gələ
bilmirlər. Qərb söz oyununa keçib. Hər dəfə ultimatumlar verdikcə də Rusiya
onları ələ salır.”
Ekspert qeyd edir ki, bu gün beynəlxalq
aləmdə baş verənlərə diqqət yetirmək kifayətdir: “Adi bir şeyə - Tramp ilə
Rusiyanın Təhlükəsizlik Şurasının katibi, keçmiş prezident Medvedev arasında
baş verənlərə. Yəni, bu münaqişənin sonu indiki vəziyyətdə görünmür. Rusiyanın
qalib gəlmə ehtimalı daha yüksəkdir. Ukraynanın raketdən müdafiə sistemləri
yoxdur. Avropanın silah anbarlarında silah stoku tükənib. Yaxın Şərqdəki
savaşda daha çox silah xərclədilər, yəni o ehtiyat hissələr artıq əllərində
qalmayıb.”
Ekspert həmçinin qeyd edir ki, Qərb
Ukraynadakı siyasi rəhbərliyi dəyişməyə çalışır: “İndi Qərb çalışır ki, bu
yaxınlarda Ukrayna Prezidenti Volodimir Zelenskini hakimiyyətdən salsın və onun
yerinə fərqli bir adam gətirsin. Çünki Putin Zelenskiyə şəxsə qarşı daha sərt
mövqe sərgiləyib”.
Mehriban Yariyeva
12:28 04.08.2025
Oxunuş sayı: 843
