Putinin “gözləyirik” mesajı: Sülh çağırışı, yoxsa psixoloji təzyiq?
Rusiya Prezidenti Vladimir Putin bildirib ki, əgər Kiyev danışıqlar üçün vaxtın yetişmədiyini düşünürsə, Moskva gözləməyə hazırdır. O, Rusiya və Ukrayna nümayəndələrinin İstanbulda keçirdiyi görüşləri ümumilikdə müsbət dəyərləndirib və sülhə nail olmaq üçün ciddi, lakin ictimai olmayan danışıqların vacibliyini vurğulayıb. Putin qeyd edib ki, Rusiya Ukraynada uzunmüddətli və sabit sülhün tərəfdarıdır.
Putinin bu açıqlaması həm diplomatik təzyiq vasitəsidir, həm də Rusiyanın danışıqlara açıq olduğunu göstərmək məqsədi daşıyır. Lakin “açıq şəkildə deyil” ifadəsi prosesin qeyri-şəffaf və Rusiya şərtləri ilə aparılmaq istəndiyini göstərir. Bu isə real və bərabər əsaslı sülh perspektivini zəiflədə bilər.
Mövzu ilə bağlı politoloq Əhəd Məmmədli Crossmedia.az-a açıqlama verib.
Politoloq Putinin Kiyevə psixoloji təsir etmək istədiyini bildirib: “Putin xüsusi xidmət orqanlarının əməkdaşı olub. O, psixoloji təzyiqi yaxşı bacarır. Bu açıqlaması ilə bildirmək istəyir ki, Kiyev hər hansısa sülh müqaviləsi və ya danışıqlar üçün gözləməyə hazırdır. Yəni Kiyevə demək istəyir ki, Ukrayna nə qədər sülh müqaviləsinə razı olmasa, digər görüşə daha çox itkilərlə gələcək. Ukrayna da müqavimətin davam edəcəyi, silahlar gələcəyi təqdirdə vəziyyətin dəyişiləcəyini bilir. İndi hansı düşüncə doğrudur? Hələlik Putinin cəbhədə üstün olması onu daha doğru göstərsə də, durum dəyişə bilər. Fakt odur ki, Rusiya cəbhədə pis-yaxşı uğur qazanıb, irəliləyib, ərazi işğal edib. Amma artıq Rusiya Ukrayna cəbhəsində bataqlıqdadır. Bu uzun müddət belə davam etsə, Ukrayna daha da torpaq itirər, Rusiya isə daha da çox bata bilər. Belə risklər mövcuddur. Putin isə bunu nəzərdə tutur ki, Ukrayna risk etmək istəyirsə, biz gözləyirik. Bu, Kreml üçün də risk hesab olunur, lakin Putin bunu dilə gətirmir. Gələcəkdə hansı tərəf üçün bu risklər mənfi təsir bağışlayacaqsa, bunu müharibənin gedişatı göstərəcək. Əlbəttə, hər sülhün əvvəli müharibədir. Müharibə nəticəsindən asılı olaraq sülh bağlanılır. İndiki vəziyyətdə hər iki tərəf üçün də risk davam edir. Ukrayna müqavimət göstərib, Rusiyanı bataqlığa çəkə bilsə, müharibənin gedişatını dəyişə bilər”.
Nicat Rüstəmzadə
11:22 03.08.2025
Oxunuş sayı: 14305
