"Rusiya başa düşməlidir ki, ABŞ-nin indiki administrasiyası ilə münasibətlər pozulsa, yaxın illərdə..." -Şərh
Ukrayna Prezidenti Volodimir Zelenski rusiyalı həmkarı Vladimir Putinlə sülh sazişinin şərtlərini müzakirə etmək üçün danışıqlar aparmağa hazır olduğunu bildirib. Ukrayna lideri bu barədə teleqram sosial şəbəkəsindəki səhifəsində yazıb.
"Biz Rusiyadan bəyanatlar eşidirik. Bu, müharibəni ləyaqətlə bitirmək və həqiqətən uzunmüddətli sülh yaratmaq üçün onların ciddi hazırlığının siqnalıdır. Ukrayna istənilən vaxt liderlər səviyyəsində görüşə hazır olduğunu bir daha təsdiqləyir", - o vurğulayıb.
V.Zelenskinin sözlərinə görə, Ukrayna liderlər arasında danışıq səviyyəsinə keçməyi təklif edir: “ABŞ bunu təklif edib. Ukrayna bunu dəstəklədi. Rusiyanın hazırlığı lazımdır”.
Onun sözlərinə görə, Kiyevdə ABŞ Prezidenti Donald Trampın müharibəni bitirmək və uzunmüddətli sülhə nail olmaq ilə bağlı səyləri dəstəklənir.
Faha əvvəl V.Putin bildirib ki, həm Rusiya, həm də Ukrayna üçün məqbul olan əsaslarda uzunmüddətli və möhkəm sülh yaratmaq lazımdır.
Zelenskinin Putinlə sülh danışıqları aparmağa hazır olduğunu təsdiqləməsi regionda davam edən müharibə fonunda mühüm diplomatik irəliləyişdir. Münaqişənin başlandığı gündən bəri ilk dəfə olaraq rəsmi Kiyevin bu cür açıq razılıq ifadə etməsi beynəlxalq ictimaiyyətdə də illərdir davam edən müharibənin bitməsinə ümid yaradır. Bu addım, həmçinin sülhün reallaşması üçün yeni siyasi platformaların və vasitəçilik mexanizmlərinin işə salınacağı ehtimalını artırır. Lakin bu açıqlamanın real və davamlı nəticələrə çevrilməsi üçün qarşı tərəfin mövqeyi, danışıqların formatı, məzmunu və üçüncü tərəflərin iştirakı kimi mühüm detallar hələ də aydın deyil.
Mövzu ilə bağlı politoloq İlqar Vəlizadə Crossmedia.az-a açıqlama verib:
“Hadisələr göstərir ki, ABŞ prezidenti Donald Trampın ultimatumu tərəflərə təsir edir. Rusiya reallıqlardan çıxış etməli və başa düşməlidir ki, ABŞ-nin indiki administrasiyası ilə münasibətlər pozulsa, yaxın illərdə istədiyi sülhü əldə edə bilməz. Həmçinin Ukrayna da başa düşür ki, müharibənin davam etməsinin ona heç bir faydası yoxdur. Əksinə, insanlar tələf olur, şəhərlər dağıdılır. Ona görə tərəflər sülh üçün addım atmağa başlayır. Amma bu sülh danışıqlarında hansı məsələlər müzakirə ediləcək, yekun sülh sənədi hansı iddiaları özündə birləşdirəcək onu zaman göstərəcək”.
Ayhan
13:07 02.08.2025
Oxunuş sayı: 12746
