Rusiyanın bu istəyi Ermənistan üçün çətinlik yarada bilər — AÇIQLAMA
Ermənistanın baş naziri Nikol Paşinyanın Rusiyaya ardıcıl səfərləri, onun hakimiyyətə gəldiyi dövrdəki anti-Rusiya ritorikası ilə ziddiyyət təşkil edir. Baş nazir Qərblə siyasi və təhlükəsizlik sahəsində əlaqələri genişləndirəcəyini deyirdi. Lakin son zamanlar Moskva ilə təmaslarını artırması diqqət çəkir. Bu Paşinyanın geosiyasi proseslərə qeyri-peşəkar, diletant yanaşmasının göstəricisi kimi qiymətləndirilə bilər. O, bir tərəfdən Avropa və NATO ilə inteqrasiyanı vurğulayır, digər tərəfdən isə Rusiyaya jest xarakterli səfərlər edir. Bu ziddiyyətli davranışlar Ermənistanın xarici siyasətində qeyri-müəyyənlik yaradır. Bu regionda, xüsusilə Cənubi Qafqazda yeni problemlərin yaranmasına səbəb ola bilər. Paşinyanın bu balanssız və ziddiyyətli siyasəti, həm ölkədaxili, həm də beynəlxalq müstəvidə ciddi suallar doğurur.
Mövzu ilə bağlı Crossmedia.az-a açıqlama verən politoloq Aydın Quliyev bildirib ki, Paşinyan Rusiyaya münasibətdə siyasətini artıq qətiyyətlə müəyyənləşdirib:
“Eyni zamanda onun Avrointeqrasiya ilə bağlı mövqeyi də aydındır. Siyasi təhlükəsizlik baxımından Paşinyanın Rusiya və Qərb arasında seçimləri artıq məlumdur. O, NATO strukturlarına, Avropa İttifaqına (Aİ) siyasi cəhətdən daha çox inteqrasiya etməkdə maraqlıdır, nəinki Rusiyanın düşərgəsinə. Bununla belə, Paşinyanın Altayda keçirilən ətraf mühit konfransına qatılması düşündürücüdür. Çünki bundan əvvəl Ermənistan KTMT və digər postsovet strukturların toplantılarında iştirakdan imtina edib. Hazırkı şəraitdə Ermənistan siyasi və təhlükəsizlik məsələlərində Qərbə inteqrasiya etməyə çalışsa da, iqtisadi müstəvidə hələlik Rusiya və ona yaxın ölkələrlə əlaqələri qorumağa ehtiyac duyur.
Ermənistan bir tərəfdən Qərb strukturları ilə siyasi yaxınlaşma siyasəti yürüdür, digər tərəfdən isə Rusiya və onun müttəfiqləri ilə iqtisadi əlaqələri saxlamağa çalışır. Hazırda Ermənistanda narahatlıq var ki, Avrasiya İqtisadi Birliyi çərçivəsində Ermənistanın imkanları məhdudlaşdırıla bilər. Digər tərəfdən, Ermənistanın Aİ-yə iqtisadi inteqrasiya baxımından hələlik ciddi nəticələr əldə etmədiyi üçün Rusiyanın iqtisadi əlaqələri zəiflətmək istəyi Ermənistan üçün çətinlik yarada bilər.
Bu səbəbdən Paşinyan iqtisadi əməkdaşlıq məsələlərində hələlik Moskvadan tam qopmaq istəmir. O, iqtisadi-ticarət müstəvisində Rusiya ilə əməkdaşlığı davam etdirməyə, siyasi və təhlükəsizlik müstəvisində isə daha çox Qərblə yaxınlaşmağa çalışır. Bu, əlbəttə, çox çətin və ip üzərində aparılan siyasətdir. Amma Paşinyan bu yolu seçib və davam etdirir.
Paşinyanın Altaydakı konfransa tələm-tələsik qatılması da məhz Rusiyanın və onun müttəfiqləri ilə iqtisadi-ticarət əlaqələrini qoruyub saxlamaq cəhdləri ilə bağlıdır. Çünki bu əlaqələrin davam etdirilməsi Ermənistana Qərb istiqamətində siyasi addımlar atmaq üçün daha rahat atmaq imkanı verir. Məsələn, son günlərdə Rusiyadan Ermənistana gələn qaz kəmərinin Gürcüstan ərazisində “müvəqqəti təmir” adı altında dayandırılması olduqca şübhəli görünür. Bu, Ermənistana iqtisadi təzyiq vasitəsi kimi qiymətləndirilə bilər. Eyni zamanda, Rusiyada xarici işlər nazirin müavini səviyyəsində açıq şəkildə etiraf olunub ki, son vaxtlar Rusiya ilə Ermənistan arasında iqtisadi əlaqələr zəifləyib. Bu, əslində Rusiya tərəfindən Ermənistana ünvanlanan bir mesaj kimi qəbul oluna bilər ki, Rusiya iqtisadi əlaqələri daha da zəiflədə bilər. Bu isə Ermənistan üçün ciddi hədədir. Çünki Ermənistan Rusiya ilə iqtisadi əlaqələrin zəifləməsindən və qırılmasından narahatdır. Paşinyan iqtisadi və ticarət xarakterli əlaqələrin Moskva ilə qorunub saxlanmasında, eyni zamanda siyasi müstəvidə Qərbə inteqrasiyada maraqlıdır”.
Nəzrin Salmanova
21:12 25.07.2025
Oxunuş sayı: 1750
