"Rusiyanın bu addımları münasibətlərdə ciddi böhran yaratdı" - Deputat
Rusiya Baş nazirinin müavini Aleksey Overçuk bildirib ki, Rusiya və Azərbaycan arasında iqtisadi əlaqələr inkişaf edir və qarşılıqlı dəstəklənir. Onun sözlərinə görə, bu münasibətləri pozmaqda heç bir tərəf maraqlı deyil. Overçuk bu fikirləri "Rossiya-1" telekanalına müsahibəsində səsləndirib.
Aleksey Overçukun bu açıqlaması, son aylar baş verən gərgin hadisələr fonunda Rusiya tərəfinin münasibətləri sabit saxlamağa çalışdığını göstərir. Bu, həm iqtisadi maraqların qorunması, həm də siyasi zərərin minimuma endirilməsi məqsədi daşıyan klassik diplomatik yanaşmadır. Rusiya üçün Azərbaycanla iqtisadi tərəfdaşlıq regional təsir imkanlarını qorumaq baxımından strateji əhəmiyyət daşıyır.
Mövzu ilə bağlı Milli Məclisin deputatı Naqif Həmzəyev Crossmedia.az-a açıqlama verib.
Millət vəkili qəzanın münasibətlərdə köklü dəyişikliklərə səbəb olduğunu bildirib: “2024-cü ilin 25 dekabr tarixində Bakıdan Qroznıya uçan Azərbaycan Hava Yollarına məxsus "Embraer 190" təyyarəsinin Aktau yaxınlığında qəzaya uğraması və nəticədə 38 nəfərin həlak olması münasibətlərdə köklü dəyişikliyə səbəb oldu. Azərbaycan tərəfi təyyarənin Rusiya tərəfindən vurulduğunu iddia edərək beynəlxalq məhkəməyə müraciət üçün sənədlər hazırlayır. Rusiya tərəfindən qəza ilə əlaqədar yekun nəticələrin 2025-ci ilin dekabrında təqdim edilməsi gözlənilir. AZAL təyyarəsi faciəsindən altı ay sonra, 2025-ci ilin iyun ayının 27-də Yekaterinburq şəhərində azərbaycanlıların yaşadığı evlərə Rusiya hüquq-mühafizə orqanları tərəfindən həyata keçirilən basqınlar zamanı qanuna zidd əməllər nəticəsində iki Azərbaycan vətəndaşının həlak olması münasibətlərdə növbəti ciddi böhran yaratdı”.
N. Həmzəyev Rusiya Baş nazirinin müavinin açıqlamasını klassik diplomatik zərər nəzarəti strategiyasının nümunəsi kimi dəyərləndirib: “Rusiya Baş nazir müavininin açıqlaması, ilk növbədə Yekaterinburq hadisəsindən sonra yaranmış diplomatik gərginliyi azaltmaq məqsədi daşıyır. Bu, klassik diplomatik zərər nəzarəti strategiyasının nümunəsidir. Problemli hadisəni kiçiltmək və ümumi münasibətlərin normal çərçivədə davam etdiyini vurğulamaq bu məqsədə xidmət edir”.
Elmir Heydərli
16:41 25.07.2025
Oxunuş sayı: 9448
