Putin və Zelenski görüşür?: "Hər iki tərəf çalışacaq ki..."
Rusiya ilə danışıqlar üzrə Ukrayna nümayəndə heyətinin rəhbəri, Ukraynanın Müdafiə və Təhlükəsizlik Şurasının rəhbəri Rustem Umerov İstanbul danışıqlarının üçüncü raundunda Ukrayna tərəfi avqustun sonuna qədər Vladimir Putin və Volodimir Zelenski arasında görüş keçirməyi təklif edib.
R.Umerov İstanbulda danışıqlar başa çatdıqdan sonra jurnalistlərə deyib: "Belə bir görüş real siyasi irəliləyişə nail ola bilər. Rusiya hazır olduğunu nümayiş etdirməlidir. Ukrayna tam və qeyd-şərtsiz atəşkəsdə israr etməkdə davam edir. Atəşkəs mülki obyektlərə və kritik infrastruktura hücumların tamamilə dayandırılmasını ehtiva etməlidir".
Umerovun sözlərinə görə, görüşün avqustun sonuna qədər keçirilməsi təklif olunur. İclasda Ukrayna, Rusiya, ABŞ və Türkiyə liderləri iştirak edəcək.
Rusiya nümayəndə heyətinin rəhbəri Vladimir Medinski bildirib ki, liderlər səviyyəsində görüşdən əvvəl sülh sazişinin detallarını işləyib hazırlamaq lazımdır.
Belə bir görüşün mümkünlüyü və proseslərin inkişaf perspektivi barədə Crossmedia.az-a danışan hərbi ekspert Azad İsazadə bildirib ki, İstanbul görüşü istər Ukrayna, istərsə də Rusiya üçün daha çox formal xarakter daşıyır: “Mənə elə gəlir ki, İstanbul görüşü istər Ukrayna, istərsə də Rusiya üçün daha çox formal xarakter daşıyacaq. İnanmıram ki, nəticədə Putinlə Zelenski görüşə bilsinlər. Belə bir görüşün baş tutması üçün əvvəlcə minimum səviyyədə atəşkəs razılığına nail olunmalıdır. Putinlə Zelenski görüşü üçün çox güman ki, əvvəlcə minimum atəşkəs razılığına nail olunmalıdır. Yəni iki tərəf də döyüşləri dayandırmalıdır ki, konkret məsələləri müzakirə edə bilsinlər".
A.İsazadə qeyd edib ki, hazırda tərəflər bir-birinin tələblərinə razı deyillər: “Bu gün nə Putin, nə də Zelenski qarşı tərəfin tələblərinə razıdır. Zelenski Rusiyanın işğal etdiyi dörd vilayətdən- Xerson, Zaporojye, Donetsk və Luqanskdan imtina etməyə hazırdır. Hazırda danışıqların predmeti belə formalaşmayıb. Yayda hər iki tərəf çalışacaq ki, döyüş nəticəsində cəbhədə özləri üçün əlverişli mövqelər tutsunlar. Buna görə də hələ danışıqlardan nəsə gözləmək, məncə, tezdir. Görüşlərin humanitar baxımdan faydası olsa da, ciddi nəticələr gözləməyə hələ əsas yoxdur. Amma bu, o demək deyil ki, görüşmək lazım deyil. Minimum səviyyədə, heç olmasa, əsirlərin dəyişdirilməsi, meyitlərin qaytarılması kimi məsələlər üzrə razılığa gəlirlər. Hansısa humanitar məsələlər az da olsa həll olunur. Təəssüf ki, hələ bundan artıq nəyisə gözləmək tezdir.”
Mehriban Yariyeva
14:48 24.07.2025
Oxunuş sayı: 8618
