Aygün Əliyeva 50 illik yubileyi münasibətilə Elman Cəfərlini təbrik edib
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva 50 illik yubileyi münasibətilə “Yaşıl Dünya” Ekoloji Maarifləndirmə İctimai Birliyinin sədri Elman Cəfərlini təbrik edib.
Crossmedia.az-ın məlumatına görə, təbrik məktubunda deyilir:
“Hörmətli Elman müəllim! Sizi “Yaşıl Dünya” Ekoloji Maarifləndirmə İctimai Birliyinin sədri kimi Azərbaycan vətəndaş cəmiyyətində ekoloji maarifləndirmə və davamlı inkişaf sahəsində göstərdiyiniz misilsiz xidmətlərə görə, 50 illik yubileyiniz münasibətilə Qeyri-Hökumət Təşkilatlarına Dövlət Dəstəyi Agentliyi adından səmimi qəlbdən təbrik edirik.
Uzun illər ərzində ictimai sektorun inkişafına, xüsusilə də ətraf mühitin qorunması və ekoloji maarifləndirmə sahəsində göstərdiyiniz səmərəli fəaliyyət, vətəndaş cəmiyyətinin gücləndirilməsi istiqamətində apardığınız təşəbbüslər yüksək dəyərləndirilir.
QHT sədri kimi siz öz vəzifənizi böyük məsuliyyət və fədakarlıqla yerinə yetirərək cəmiyyətimizdə ekoloji şüurun formalaşdırılmasına, təbii sərvətlərimizin qorunmasına və vətəndaşların maarifləndirilməsinə əvəzsiz töhfələr vermisiniz. Sizin rəhbərliyinizlə “Yaşıl Dünya” Ekoloji Maarifləndirmə İctimai Birliyi ətraf mühitin mühafizəsi istiqamətində bir çox uğurlu layihə və təşəbbüslər həyata keçirmiş və geniş ictimai dəstək qazanmışdır.
Məqsədyönlü və nümunəvi fəaliyyətinizin bundan sonra da uğurla davam edəcəyinə, sağlam və təmiz ətraf mühit uğrunda mübarizənizin yeni hədəflər və nailiyyətlərlə zənginləşəcəyinə inanırıq.
Yubileyiniz mübasibətilə sizə möhkəm cansağlığı, ruh yüksəkliyi və gələcək fəaliyyətinizdə uğurlar arzulayırıq.
Əminik ki, bundan sonra da ekologiya sahəsində təşəbbüsləriniz uğurla davam edəcək və yeni nəsillər üçün sağlam ətraf mühitin formalaşmasına töhfə verəcək.
Yubileyiniz mübarək!”
18:17 18.07.2025
Oxunuş sayı: 2004
