Dövlət qərar verdi - bu qəzetlər birləşdirildi
Azərbaycanın rəsmi informasiya siyasətində mühüm dəyişiklik baş verib: uzun illər dövlət mətbuatında önəmli yer tutan “Xalq qəzeti” və “Respublika” qəzeti birləşdirilib. Prezidentin bu istiqamətdə imzaladığı fərman dövlət informasiya siyasətində səmərəliliyin artırılması, təkrarlanan funksiyaların aradan qaldırılması və resursların daha məqsədyönlü istifadəsi baxımından əhəmiyyətli bir addım kimi dəyərləndirilir.
Hər iki qəzet uzun illər ərzində oxuculara rəsmi xəbərləri, dövlət sənədlərini və hökumət mövqelərini çatdırmaqda mühüm rol oynasa da, son dövrlərdə onların məzmun baxımından bir-birini təkrarlaması bu addımı zəruri edirdi.
Mövzu ilə bağlı media eksperti Yadigar Məmmədli Crossmedia.az-a bildirib ki, dövlətin rəsmi qəzetlərinin bağlanması ilə bağlı verilən qərar, eyni funksiyanı daşıyan qurumların optimallaşdırılması baxımından Prezident Administrasiyasının müvafiq addımı kimi qiymətləndirilə bilər:
“Söhbət əsasən “Respublika” və “Xalq” qəzetlərindən gedir. Bu iki nəşrin birinin ləğvi məsələsi artıq uzun müddətdir müzakirə olunurdu. Bu baxımdan, cənab Prezidentin bu gün imzaladığı fərman
isə təqdirəlayiqdir. Çünki hər iki qəzetdə eyni məzmunlu xəbərlər təqdim olunurdu və bu, təkrarçılığa səbəb olurdu. Məncə, artıq bu izafi xərclərə yol verilmədən qəzetlərin birləşdirilməsi daha məqsədəuyğun addımdır”.
Ekspert həmçinin əlavə edib ki, həm də bu qərar mətbuatın inkişafı və səmərəliliyin artırılması baxımından müsbət qiymətləndirilə bilər:
“Biz hər zaman qeyd edirdik ki, dövlət orqanlarının sayı azaldılmalı və bir-birini təkrarlayan, dublikat xarakterli nəşrlərin fəaliyyəti dayandırılmalıdır. Bu baxımdan verilmiş qərarı doğru və zəruri addım hesab edirəm”.
Fidan Xəlilova
21:08 11.07.2025
Oxunuş sayı: 12549
