Tramp bacarmadığını etiraf etdi: “Rusiya ilə Ukrayna arasında yaxın zamanda atəşkəsin əldə olunması üçün real şərait mövcud deyil”
ABŞ prezidenti Donald Tramp Rusiya lideri Vladimir Putinlə telefon danışığının yekunlarına əsasən bildirib ki, Ukrayna məsələsi ilə bağlı danışıqlarda irəliləyiş yoxdur.
"Bizim söhbətimiz oldu. Kifayət qədər uzun söhbət zamanı biz İran da daxil olmaqla bir çox məsələləri müzakirə etdik. Biz həmçinin Ukrayna münaqişəsi barədə danışdıq, mən narazıyam", - deyə o bildirib.
Dünən Trampla Rusiya lideri Vladimir Putin arasında telefon danışığı zamanı ABŞ lideri Ukraynada hərbi əməliyyatların tezliklə başa çatdırılması məsələsini yenidən qaldırıb.
Ağ Ev rəhbəri daha əvvəl də bir neçə də Rusiya- Ukrayna savaşı barədə bədbin fikirlər səsləndirib. Halbuki o, hakimiyyətə gəlməzdən əvvəl müharibəni bir neçə günə bitirə biləcəyini iddia edirdi. Görünür, ya gücü çatmadı, ya da...
Politoloq Aytən Qurbanova Crossmedia.az-a açıqlamasında bu “ya da” barədə danışdı: “İlkin mərhələdən bu yana verilən vədlərin yerinə yetirilməməsi böyük güclərə olan inamı sarsıdır. Düşünürəm ki, ABŞ və Rusiya arasında Ukrayna ilə bağlı aparılan danışıqların nəticəsiz qalması həm regional, həm də qlobal sülh üçün ciddi təhdidlər formalaşdırır. Çünki ilk mərhələdən etibarən Tramp administrasiyasının verdiyi vədlər, təəssüf ki, aylar keçməsinə baxmayaraq özünü doğrultmayıb. Hazırkı mərhələdə Rusiya hərbi müstəvidə üstünlüyünü möhkəmləndirdikcə, Ukraynanın mövqeyi daha da zəifləyir. Bu, atəşkəsin yaxın perspektivdə mümkün olmadığını göstərir. Rusiya-Ukrayna müharibəsində qısa müddətdə atəşkəsə nail olunmasının mümkünlüyü ciddi sual altındadır. Xüsusilə hərbi cəbhədə Rusiyanın getdikcə irəliləməsi və Ukrayna ərazilərinin işğal altına düşməsi, eyni zamanda ABŞ-nin Ukraynaya dəstəyini tədricən dayandırması onu göstərir ki, yaxın zamanda atəşkəsin əldə olunması üçün real şərait mövcud deyil”.
Onun sözlərinə görə, diplomatik masada Ukraynanın zəif təmsil olunması həm siyasi, həm də psixoloji cəhətdən mənfi təsirlər doğurur: “Bu, təkcə münaqişənin həllinə deyil, Ukraynanın gələcək suverenliyinə də mənfi təsir göstərir. Ukraynanın danışıqlar masasında bu qədər zəif şəkildə təmsil olunması nəinki münaqişənin həllinə, həmçinin atəşkəsin əldə olunmasına da ümidləri azaldır. Bu vəziyyət ümumilikdə Ukraynanın gələcəyi ilə bağlı ciddi şübhələr yaradır. Rusiya tərəfinin getdikcə daha sərt və aqressiv xarici siyasət kursu seçməsi isə vəziyyəti daha da riskli edir. Aytən xanım xəbərdarlıq edir ki, bu dinamika təkcə regiona deyil, bütövlükdə dünyaya təsir göstərə bilər. Bütün bunlar isə təkcə regional deyil, eyni zamanda qlobal sülh üçün də ciddi təhlükələr yaradır. Xüsusilə Rusiyanın getdikcə daha aqressiv xarici siyasət kursunu nəzərə alsaq, yaxın gələcəkdə təhlükəsizliklə bağlı risklərin daha da artacağı qənaətindəyəm. Hazırkı geosiyasi mənzərə göstərir ki, təkcə diplomatik niyyətlər kifayət deyil. Münaqişənin dayandırılması üçün qətiyyətli siyasi iradə, beynəlxalq hüquqa əsaslanan real təşəbbüslər və bərabər tərəfdaşlıq yanaşması zəruridir. Əks halda, bu qarşıdurmanın yaratdığı zəncirvari təsirlər daha geniş miqyasda dağıdıcı nəticələr doğura bilər”.
Mehriban Yariyeva
20:15 04.07.2025
Oxunuş sayı: 4383
