Tofiq Zülfüqarov: "Rusiyada azərbaycanlılara qarşı təzyiqlər sifarişdir, əlaqələr kəsilə bilər" - MÜSAHİBƏ
Azərbaycan vətəndaşlarının və azərbaycanəsilli şəxslərin Rusiyanın hüquq-mühafizə orqanlarının əməkdaşları tərəfindən işgəncələrə məruz qoyulmaqla iki nəfərin xüsusi amansızlıqla qəsdən öldürülməsi faktı üzrə Azərbaycanın Baş prokuroru tərəfindən cinayət işi başlanıb.
Bu barədə Baş Prokurorluqdan məlumat verilib.
Bildirilib ki, ilkin istintaqla müəyyən edilib ki, iyunun 27-də səhər saatlarında Rusiya Federasiyasının Milli Qvardiyasının, Daxili İşlər Nazirliyinin və Federal Təhlükəsizlik Xidmətinin Sverdlovsk vilayəti üzrə əməkdaşlarının iştirakı ilə Yekaterinburq şəhərində həyata keçirilmiş birgə əməliyyat-axtarış tədbirləri zamanı Yekaterinburq şəhərində müxtəlif ünvanlarda yaşayan Azərbaycan Respublikası vətəndaşları və azərbaycanəsilli şəxslər əvvəlki dövrlərdə törədilmiş cinayətlərdə iştirak etməkdə şübhəli bilinərək saxlanılıb.
Rusiya Federasiyasının adları qeyd olunan əməliyyat-axtarış fəaliyyəti subyektlərinin səlahiyyətli vəzifəli şəxsləri tərəfindən bir qrup halında azadlığı məhdudlaşdırılmaqla faktiki köməksiz vəziyyətdə olan, özünü zərbələrdən qorumaq imkanı olmayan Azərbaycan vətəndaşları və azərbaycanəsilli digər şəxslərə həm saxlama prosesində, həm daşındıqları nəqliyyat vasitələrində, əməliyyat-axtarış subyektlərinin yerləşdiyi inzibati binalarda bərk küt əşyalarla bədənlərinin müxtəlif nahiyyətlərinə çoxsaylı zərbələr endirilməklə işgəncələrə məruz qoyulub və ağır bədən xəsarətləri yetirilib.
Nəticədə 1966-cı il təvəllüdlü - 60 yaşlı, xırda sahibkarlıq fəaliyyəti ilə məşğul olan Azərbaycan Respublikasının vətəndaşı Hüseyn Səfərov həmin gün saat 15 radələrində Yekaterinburq şəhərində daxili işlər orqanının inzibati binasında, onun qardaşı – 1970-ci il təvəllüdlü - 55 yaşlı, taksi sürücüsü kimi fəaliyyət göstərən iki övlad atası Ziyəddin Səfərov isə səhər saatlarında əməliyyat qurumuna məxsus xidməti avtomobildə aldığı xəsarətlər nəticəsində xüsusi amansızlıqla qəsdən öldürülüb.
İstintaq zamanı təyin edilmiş Məhkəmə tibbi-ekspertizasının rəyinə əsasən Səfərov Hüseyn Mehti oğluna yetirilmiş çoxsaylı xəsarətlər, o cümlədən qabırğaların çoxsaylı sınıqları və sair fonunda yaranmış postravmatik və posthemorrogik şok nəticəsində, sonuncunun qardaşı 10.12.1970-ci il təvəllüdlü Səfərov Ziyəddin Mehti oğlu isə ona yetirilmiş çoxsaylı xəsarətlər fonunda yaranmış postravmatik şok nəticəsində ölüb.
Həmçinin Rusiya Federasiyasının səlahiyyətli əməliyyat-axtarış qurumları tərəfindən saxlanılmış digər çoxsaylı şəxslərə qarşı da eyni üsulla işgəncələr tətbiq edilməsi nəticəsində müxtəlif dərəcəli bədən xəsarətləri almış digər Azərbaycan Respublikası vətəndaşlarının olması və hazırda Rusiya Federasiyası ərazisində tibb müəssisəsində müalicələrinin davam etdirilməsi müəyyən edilib.
Sözügedən hadisə bir neçə gündür ki, Azərbaycan dövlətinin, xalqının və mediasının gündəmindədir. Başqa vaxt Azərbaycana “dost” deyən rəsmi Moskva niyə indi dostunu itirməyi seçir?..Heç dostluğa yer qaldımı ki?
Keçmiş xarici işlər naziri Tofiq Zülfüqarov bu proseslərlə bağlı Crossmedia.az-a müsahibə verib.
- Rusiyada soydaşlarımıza qarşı baş verənləri necə qiymətləndirirsiniz?
- Əvvəlcə onu deyim ki, məhkəmənin qərarı olmadan kimisə ittiham etmək, o cümlədən öldürmək istənilən ölkədə cinayətdir. Bu hadisəni 25 il baş vermiş hansısa hadisə ilə əlaqələndirmək isə məntiqsizlikdir. Ümumiyyətlə, soydaşlarmıza qarşı baş verənlər sifarişlidir. Bu, Rusiya daxilində baş verən siyasi proseslərin təzahürü olmaqla həm də idarəetmədəki böhranın göstəricisidir. Rusiya ordusunda ayrı- ayı, bir – biri ilə mübarizə aparan qüvvələr var. Hətta Azərbaycan Hava Yollarına məxsus sərnişin təyyarəsinin Qroznıda vurulması hadisəsində də gördük ki, bu ölkənin havadan müdafiə sistemləri başqa qüvvələrin əlindədir. Biz indi görürük ki, Rusiya müxtəlif yollarla öz cinayətinə bəraət qazandırmağa çalışır. Kremlin, Rusiya Xarici İşlər Nazirliyinin verdiyi açıqlamalar da bunu göstərir. Rusiyada vətəndaşlar aarasında ayr- seçkilik var. Fərqli millətlərdən olan ikinci, üçüncü növ vətəndaş kimi yanaşırlar. İnsanlara milli mənsubuyyətinə görə fərq qoyulur. Bu, çox təhlükəlidir- ölkəni dağıda bilər. Rusiyadakı siyasətçilər, hətta vətənpərvər olanlar belə, ya bunu anlamır, ya da anlamaq istəmirlər. Hazırda baş verənlər SSRİ-nin son illərini xatırladır…
- Nəyi nəzərdə tutursunuz?
- Hər şey aydındır. SSRİ dağılana yaxın da imperiyada da vəziyyət belə idi: ayrı- ayrı millətdən olanlara qarşı təzyiqlər başlamışdı. Rusiyada yeni dövr başlana bilər.
- Tofiq müəllim, iddia edirlər ki, hazırda baş verənlər Rusiyanın Ermənistanın Azərbaycan və Türkiyə ilə yaxınlaşmasına reaksiyası ola bilərmi?
- Əslində mən bir çoxunun iddia etdiyindən fərqli düşünürəm. Zənnimcə, Ermənistan Rusiyadan uzaqlaşmaq üçün hələ çox yol getməlidir. Hazırkı durum əslində rəsmi Moskvaya sərf ddir. Onu da deyim ki, bu gün Ermənistanda hazırda hakimiyyətə real rəqib yoxdur.
- Sizcə, Bakı- Moskva münasibətləri hansı səviyyəyə qədər davam edə bilər?
- Təzyiqlər davam edərsə, Azərbaycan Rusiya ilə bir çox sahədə əlaqəni kəsə bilər. Bu gərginliyin səbəbkarı Bakı deyil. Odur ki, proseslərin inkişafı daha çox qarşı tərəfdən asılıdır. Onu da deyim ki, Rusiyada indi vəziyyət çox gərgindir. İnsanlar ölkəni tərk edirlər. İmmiqrasiya artır. Bu, Rusiya daxilindəki siyasi, iqtisadi və təhlükəsiz problemləri ilə bağlıdır. Düşünürəm ki, gələcəkdə Rusiyanın tək- tük yaxşı münasibəti olan digər ölkələrlə də problem yaşana bilər.
Kənan Novruzov
15:38 01.07.2025
Oxunuş sayı: 2135
