Rusiya- Ukrayna müharibəsində mühüm Krım amili- Politoloq detalları açıqladı
Son dövrlər Rusiya-Ukrayna müharibəsinin gedişatında Krım körpüsünün hərbi-strateji əhəmiyyəti xüsusi aktuallıq qazanıb. Bu mühüm infrastruktur obyektinə edilə biləcək mümkün hücumlar, həm tərəflərin taktik planlarında, həm də bölgədəki güc balansında müəyyən dəyişikliklərə səbəb ola bilər. Körpünün fəaliyyəti yalnız nəqliyyat bağlantısı ilə məhdudlaşmır – o, həm də Rusiya ordusunun cəbhə bölgələrinə təchizat imkanlarını təmin edən əsas marşrutlardan biridir. Məhz bu səbəbdən, onun zərər görməsi və ya sıradan çıxarılması məsələsi regional təhlükəsizlik və hərbi strategiya baxımından geniş müzakirə olunur.
Beynəlxalq münasibətlər və diplomatiya araşdırmaları mərkəzinin rəhbəri, politoloq Samir Hümbətov Krımın strateji əhəmiyyəti barədə Crossmedia.az-a danışıb.
Şərhçinin sözlərinə görə Krım körpüsü, işğal altında olan Krım yarımadası ilə Rusiyanın cənub-qərb bölgələri arasında strateji bağlantı rolunu oynayır: "Bu körpü həm mülki, həm də hərbi logistika baxımından mühüm əhəmiyyətə malikdir. Hazırda Rusiyanın cənub-qərb istiqamətində yerləşən əsas hərbi qüvvələrinin əhəmiyyətli hissəsi Krım ərazisində cəmləşmişdir. Buna görə də Krımın təhlükəsizliyi Rusiya üçün prioritet məsələdir. Krım körpüsünün zədələnməsi və ya tamamilə sıradan çıxarılması quru yol ilə təmin edilən logistik axının müvəqqəti olaraq dayanmasına səbəb ola bilər. Bu isə, şübhəsiz ki, müəyyən hərbi-texniki çətinliklər yarada bilər. Lakin bu cür zərbənin Rusiyanın ümumi hərbi əməliyyatlarına ciddi və uzunmüddətli təsir göstərəcəyi inandırıcı görünmür. Təcrübə göstərir ki, daha əvvəl də Krım körpüsünə hücumlar olub və Rusiya qısa müddət ərzində onun fəaliyyətini bərpa edə bilib. Böyük ehtimalla, bu dəfə də oxşar ssenari müşahidə olunacaq".
Müsahibimiz söyləyib ki, bir neçə gün ərzində logistik təchizatda gecikmələr və texniki problemlər yaşana bilər, bu, döyüşlərin ümumi gedişinə həlledici təsir göstərəcək qədər ciddi görünmür: "Qeyd etmək lazımdır ki, Rusiyanın əsas hərbi birləşmələri təkcə Krımda deyil, Belarus istiqamətində və Ukraynanın şərq cəbhəsində də yerləşdirilib".
Politoloqun gəldiyi nəticəyə əsasən, Krım körpüsünün sıradan çıxarılması hərbi və strateji baxımdan mühüm hadisədir, lakin Rusiyanın genişmiqyaslı hərbi potensialını nəzərə alaraq, bu hadisənin onların ümumi hərbi planlarına həlledici təsir göstərəcəyi ehtimalı azdır: "Bununla belə, Rusiya tərəfi belə riskləri əvvəlcədən nəzərə alaraq alternativ logistik marşrutlar və ehtiyat planlar hazırlamış ola bilər".
Ləman Həsənova
15:54 05.06.2025
Oxunuş sayı: 6641
