"Bu əməliyyatlar Rusiyanın fəaliyyətini iflic edir” — Hərbi ekspert
Ukrayna Prezidenti Volodimir Zelenski Ukrayna Silahlı Qüvvələrində kadr dəyişikliklərinin həyata keçirildiyini açıqlayıb. Bu addım ordunun döyüş qabiliyyətinin artırılması və qarşıdakı çətin mərhələlərə hazırlıq məqsədi daşıyır. Dəyişikliklərin müharibənin gedişatına müsbət təsir göstərəcəyi gözlənilir.
Mövzu ilə bağlı Hərbi ekspert Üzeyir Cəfərov Crossmedia.az-a olan açıqlamasında bildirib ki, bir müddət əvvəl Ukrayna ordusunun Baş Komandanı General Valeri Zalujniy, yəni Ukrayna ordusunun uğurlarında böyük rol oynamış bir şəxs vəzifəsindən azad edilərək diplomatik sahəyə göndərilmişdi. O qeyd edib ki, “Zalujniy ən uğurlu generallardan biri idi” və onun fəaliyyəti müsbət qiymətləndirilsə də, o zaman Prezident Zelenski və komandası tərəfindən narazılıq ifadə olunmuşdu.
Üzeyir Cəfərov əlavə edib ki, Müdafiə Naziri Rüstəm Umərovun fəaliyyətindən də narazılıq vardı və onun da yaxın zamanlarda dəyişdirilməsi gözlənilirdi. Lakin iki gün əvvəl, iyunun 2-də İstanbulda keçirilən Rusiya-Ukrayna danışıqlarında nümayəndə heyətinə elə Müdafiə Naziri Rüstəm Umərov başçılıq etdi. Ekspert vurğulayıb ki, əvvəllər bu vəzifə xarici işlər naziri və ya ofisin rəhbəri tərəfindən icra olunurdu, amma indi müdafiə naziri özü bu rolu üzərinə götürüb ki, bu da ordunun qarşısında duran vəzifələrin ciddiliyindən xəbər verir.
Üzeyir Cəfərov bildirib ki, bu dəyişikliyin əsas məqsədi qarşıda duran təxribatların və əməliyyatların daha səmərəli yerinə yetirilməsi üçün ordunun gücünü artırmaqdır. O qeyd edib: “Burada hər hansı başqa məqsəd və niyyət görmürəm. Düşünmək lazım deyil ki, uğursuzluq var. Zelenski sadəcə qarşıdakı dövr üçün daha möhkəm və effektiv bir komanda qurmağa çalışır".
Ekspertin sözlərinə görə, Ukrayna ordusu hazırda çox çətin bir vəziyyətdədir. Sumı vilayətində ağır döyüşlər davam edir və hər gün bir yaşayış məntəqəsi Rusiya ordusunun nəzarətinə keçir. Buna baxmayaraq, bu, Ukrayna ordusunun ruhunu sındırmır. “Çünki Ukrayna ordusu Rusiyanın dərinliklərinə, o cümlədən strateji bombardmançı təyyarələrin yerləşdiyi aero-dromlara qədər uğurlu əməliyyatlar həyata keçirir. Bu əməliyyatlar Rusiyanın fəaliyyətini iflic edir” – deyə Üzeyir Cəfərov əlavə edib.
Ü.Cəfərov vurğulayıb ki, qarşıdakı yay kampaniyasında Ukrayna Silahlı Qüvvələrinin üzərinə böyük məsuliyyətlər düşür. Ukrayna ordusu artıq yalnız torpaqlarını müdafiə etməklə kifayətlənmir, həm də havada və suda mübarizə aparır. Bu səbəbdən də kadr dəyişiklikləri ordunun gücləndirilməsi məqsədilə atılmış zəruri addımdır.
Hərbi ekspert əlavə edib ki, Rusiya atəşkəsə meyilli deyil və bu səbəbdən də panikaya və ya uğursuzluq təhlillərinə ehtiyac yoxdur. “Ukrayna ordusu lazımi dərslərini alır və qarşıdakı həlledici mərhələyə hazırdır" – deyə o vurğulayıb.
Üzeyir Cəfərovun fikrincə, kadr dəyişikliyi ordunun gələcək uğurları üçün zəruridir və hazırda bütün diqqət qarşıdakı əməliyyatlara yönəldilib. O bildirib: “Bu dəyişiklər uğursuzluq göstəricisi deyil, əksinə, müharibənin gedişatında ortaya çıxan yeni çağırışlara cavabdır. Zelenski və komandası bu çağırışları nəzərə alaraq ordunun effektivliyini artırmağa çalışır".
Ekspertin sözlərinə görə, Zelenski öz komandasını daha da gücləndirmək istəyir və qarşıdakı aylarda Ukrayna Silahlı Qüvvələri üzərinə çox böyük məsuliyyət düşür. O qeyd edib ki, Ukrayna ordusu hazırda Rusiyanın dərinliklərinə qədər uğurlu əməliyyatlar həyata keçirir və qarşıdakı yay kampaniyasında həlledici mərhələyə qədəm qoyur.
Fatimə Nəbiyeva
16:45 04.06.2025
Oxunuş sayı: 1014
