Turizm, ticarət və investisiyalar üçün əlverişli şərait yarana bilər - AÇIQLAMA
Prezident İlham Əliyevin rəhbərliyi ilə işğaldan azad edilmiş torpaqlarda genişmiqyaslı bərpa və yenidənqurma işləri aparılır. Bu proses bölgənin sosial-iqtisadi inkişafına və məcburi köçkünlərin öz doğma yurdlarına qayıdışına şərait yaratmaq məqsədini daşıyır. Yol infrastrukturu, enerji təminatı, suvarma sistemləri və digər mühüm sahələrdə sürətli yenidənqurma işləri həyata keçirilir. Regionun infrastrukturunun yenidən qurulması, yaşayış məntəqələrinin bərpası və sosial obyektlərin inşası sürətlə davam edir. Laçın Beynəlxalq Hava Limanının açılışı bu prosesin mühüm addımlarından biridir.
Mövzu ilə bağlı Crossmedia.az-a açıqlama verən Milli Məclisin deputatı Pərvanə Vəliyeva ilk olaraq bildirib ki, Laçın rayonu Azərbaycan Respublikasının Qarabağ bölgəsində yerləşən strateji əhəmiyyətə malik ərazidir:
“2020-ci ildə Azərbaycan və Ermənistan arasında imzalanmış üçtərəfli bəyanat nəticəsində Laçın rayonu Azərbaycana hərbi əməliyyatlarsız qaytarılıb. Ali Baş Komandan İlham Əliyev tərəfindən qısa müddətdə regionda nəqliyyat, təhlükəsizlik və müdafiə infrastrukturunun yenidən qurulması istiqamətində böyük işlər görülüb. Bu kontekstdə, Laçında beynəlxalq hava limanının açılması işğaldan azad olunmuş ərazilərdə nəqliyyat infrastrukturunun diversifikasiyası baxımından böyük əhəmiyyət kəsb edir. Laçında beynəlxalq hava limanının açılması yalnız regional deyil, həm də ölkə səviyyəsində nəqliyyat qovşaqlarının genişlənməsinə təkan verəcək. Həmçinin, bölgədə iqtisadi fəallığın artırılmasına imkan yaradacaq”.
Deputatın sözlərinə görə, bu, turizm, ticarət və investisiyalar üçün əlverişli şərait yarada bilər:
“Xarici investorlar və şirkətlər bölgəyə daha rahat səfər edə bilər, bu da yeni iş yerlərinin yaradılmasına və rayon iqtisadiyyatının canlanmasına gətirib çıxara bilər.
Qarabağ və Şərqi Zəngəzurun təbii gözəllikləri və tarixi-mədəni abidələri turistlər üçün cəlbedici potensiala malikdir. Hava limanı turistlərin bölgəyə rahat və sürətli çatmasını təmin edərək turizm sektorunun inkişafına xidmət edəcək, Qarabağ və qonşu regionlar arasında kommunikasiya əlaqələrini gücləndirəcəkdir. Bu isə sosial və mədəni mübadilənin artmasına şərait yaradacaqdır. Bu, həmçinin milli təhlükəsizlik və nəqliyyat infrastrukturunun modernləşdirilməsinin nəticəsidir. Hava limanı Azərbaycanın bu strateji bölgəsində hərbi potensialın gücləndirilməsi vasitəsi kimi milli təhlükəsizliyə dəstək verə bilər. Laçın işğal dövründə uzun müddət dağıntılarla üzləşib. Bu baxımdan hava limanının tikilməsi və geniş infrastruktur işləri ciddi maliyyə vəsaiti tələb edirdi. Yol, su, elektrik, rabitə və digər mühüm xidmətlərin təminatı olmadan belə böyük layihənin həyata keçirilməsi mümkün deyildi. Azərbaycan işğaldan azad olunmuş əraziləri özü dirçəldir, ərazilərdə 2021-ci ildən bəri geniş miqyaslı quruculuq və bərpa işlərinin görülməsinə start verilib. Prezident İlham Əliyev Macarıstanda keçirilən TDT dövlətlərinin qeyri-rəsmi Zirvə görüşü zamanı bildirmişdi ki, ölkəmizdə 9 hava limanı var, onlardan 3-ü qısa müddət ərzində işğaldan azad olunmuş ərazilərdə tikilib. Bu da Azərbaycanın işğaldan qurtardığı əraziləri dirçəltməklə bağlı böyük istəyi və əzmkarlığını göstərir. Ölkə başçısının tapşırıqları əsasında böyük coşqu və həvəslə “Böyük qayıdış” davam edir, keçmiş məcburi köçkün və qaçqınlar öz doğma torpaqlarına geri dönür. Laçında beynəlxalq hava limanının açılması, ilk növbədə, bölgənin reabilitasiyasına və yenidən qurulmasına təkan verəcəkdir”.
Nəzrin Salmanova
13:08 30.05.2025
Oxunuş sayı: 3708
