Daviti Çivçivadze: “Komandamı məğlub adlandırmıram”
Komandamı məğlub adlandırmıram.
Crossmedia.az xəbər verir ki, bunu "Neftçi"nin məşqçisi Daviti Çivçivadze "Sabah"a qarşı Azərbaycan Basketbol Liqasının final matçından sonra klubun mətbuat xidmətinə açıqlamasında deyib.
Mütəxəssis seriyanın altıncı matçında məğlub olaraq (78:83) çempionluğu əldən verdikləri görüşü şərh edib:
"Mövsüm barədə onu deyə bilərəm ki, mən gələndə komandamız aşağı pillədə idi. Heç kim inanmırdı ki, komanda pley-off mərhələsində və finalda iştirak edə bilər. Ancaq gərgin əməyimiz sayəsində buna nail olduq. Onu da deyim ki, finalda ölkənin ən güclü kollektivi ilə qarşılaşdıq. Böyük əzmlə mübarizə apardıq və güclü rəqibə məğlub olduq. Buna baxmayaraq, oyunçularımla fəxr edirəm. Onların hər birini döuüşçü adlandırardım. Ancaq idmanda şans da vacibdir. Bu oyundu, qalib olduğu kimi, məğlub tərəf də var. Ancaq mən "Neftçi"ni məğlub adlandırmıram. Çünki biz ən aşağı pillədən başladıq və çempionatı ikinci pillədə bitirdik".
Qeyd edək ki, tərəflər arasında altı oyun keçirilib. Həlledici seriyada dördüncü qələbəni əldə edən "bayquşlar" qızıl medallara sahib çıxıblar.
22:41 14.05.2025
Oxunuş sayı: 11523
