Sərbəst güləş millimiz Slovakiyada keçirilən Avropa çempionatından vətənə qayıdıb
Slovakiyada keçirilən Avropa çempionatında 1 qızıl, 1 gümüş və 4 bürünc medalla komanda hesabında Avropa çempionu olan sərbəst güləş millimiz vətənə qayıdıb.
Heydər Əliyev Beynəlxalq Aeroportunda yığmamızın qarşılama mərasimi keçirilib:
Crossmedia.az xəbər verir ki, Baş məşqçi Xetaq Qazyumovun təəssüratları belə olub:
“Avropa çempionatına yaxşı hazırlaşmışdıq. 3 təlim-məşq toplanışı keçmişdik. Rusiya və Azərbaycanda bütün hazırlıq mərhələlərini tamamladıq. Bu nəticə təsadüfi deyil. Avropa çempionu olmamıza baxmayaraq, medalların kəmiyyət və keyfiyyətinə görə, daha yüksək nəticə qazanacağımıza inanırdıq. Osmandan da çempionluq gözləyirdik. Zəif çıxış edən güləşçilərimiz oldu. Səhvlərin üzərində işləyəcəyik. Ümid edirəm ki, həmin güləşçilər növbəti dəfə bu səhvlərə yol verməyərək yüksək nəticələrə imza atacaqlar”.
Debüt etdiyi böyüklərin Avropa çempionatında fəxri kürsüyə qalxan Ağanəzər Novruzov isə yarışdakı çıxışını belə dəyərləndirib:
“Şükürlər olsun, bu nəticəni əldə etdim. Amma səhvlərim çoxdur. Onların üzərində işləməliyəm. Bir az səhvlərdən, bir az da təcrübəsizlikdən yarımfinalda məğlub oldum. Məşqçilər bu il hansı yarışlarda məsləhət bilsə, o yarışlarda da iştirak edəcəyəm. Qələbəmi bütün sevdiyim insanlara həsr edirəm”.
Xatırladaq ki, Avropa çempionatında təmsilçilərimizdən Giorgi Meşvildişvili (125 kq) qızıl, Osman Nurmaqomedov (92 kq) gümüş, İslam Bazarqanov (57 kq), Əli Rəhimzadə (65 kq), Kənan Heybətov (74 kq) və Ağanəzər Novruzov (74 kq) isə bürünc medal qazanıb.
19:17 11.04.2025
Oxunuş sayı: 8645
