Bu bəyanatlar Rusiyanın mövqeyini düzgün əks etdirmir - AÇIQLAMA
Rusiya Prezidentinin mətbuat katibi Dmitri Peskovun son açıqlamasına əsasən, Vladimir Putin Ukraynada atəşkəs ideyasını dəstəkləyir. Bu bəyanat, uzun müddətdir davam edən və minlərlə insanın həyatına təsir edən münaqişənin gələcək taleyi baxımından əhəmiyyətli siqnal kimi qiymətləndirilə bilər. Lakin Kreml rəhbərinin bu mövqeyi bir çox suallar doğurur: Putin həqiqətənmi atəşkəsi istəyir, yoxsa bu, taktiki bir gediş, beynəlxalq təzyiqləri azaltmaq məqsədilə atılan addımdır? Hazırkı geosiyasi fon və döyüş meydanındakı vəziyyət, bu qərarın arxasında daha dərinə gedən səbəblərin ola biləcəyini göstərir.
Mövzu ilə bağlı politoloq Oqtay Qasımov Crossmedia.az-a açıqlama verib:
"Rusiya tərəfindən Ukraynadakı atəşkəsi dəstəkləməklə bağlı bəyanatlar çox da ciddi qarşılanmır. Bunun əsas səbəbi ondan ibarətdir ki, Rusiya bu bəyanatları verməklə həmçinin danışıqlar aparmaqla prosesi uzatmaq və öz istəklərini tam şəkildə həyata keçirməyi hədəfləyir. Bu baxımdan Rusiya tərəfindən atəşkəslə bağlı səslənən fikirlər Rusiya mövqeyini düzgün əks etdirmir. Atəşkəs istəməklə bağlı verilən bəyanatlar həm də ondan qaynaqlana bilər ki, Rusiya savaşda son 3 ildə ciddi şəkildə zəifləyib və xüsusilə də iqtisadi və sosial sferada geriləmələr var. Ona görə Rusiya hazırda istədiyi şərtlərlə atəşkəsin imzalanmasına razı olar. Amma Ukrayna bu şərtlərə necə baxacaq müəmmadır və real görünmür".
Ayhan Ağarzayev
21:29 08.04.2025
Oxunuş sayı: 10256
