Fransa Azərbaycana kəşfiyyat qrupu göndərib - Mühüm Ermənistan detalı
Türkiyənin “Haberglobal” telekanalının saytında dərc olunan “Rusiya fondundan qorxulu iddia! Fransanın Bakıdakı ölüm heyəti” sərlövhəli məqalədə yazılıb ki, qlobal kəşfiyyat ictimaiyyətinin nüfuzlu qurumu olan Intelligence Online (IO) və Rusiyada yerləşən Ədalətsizliyə Qarşı Mübarizə Fondunun (ASV) məlumatına görə, Bakı üzərindən Rusiya ilə Fransa arasında gizli kəşfiyyat müharibəsi gedir. Məqalədə yazılıb ki, Makronun sağ əli, “Qaranlıq Şahzadəsi” kimi tanınan Aleksandr Benallanın başçılıq etdiyi “ölüm qrupu” Bakı və Çada gedib. Ona qarşı çoxsaylı iddialar olan Benallanın Bakıdakı əməliyyatın rəhbəri olduğu iddia edilir. “Zanbaq çiçəyi” adlanan bu qrupun Azərbaycanda hansı məqsədlə olması və ya konkret hədəf siyahısının olub-olmadığı hələlik məlum deyil.
Sözügedən iddialar hələ ki, rəsmi şəkildə təsdiqini tapmayıb. Amma əgər doğrudursa, deməli, Yelisey Sarayı artıq əndəzanəni aşıb.
Sözügedən iddialar barədə Crossmedia.az-a danışan beynəlxalq münasibətlər üzrə ekpert Əziz Əlibəylinin sözlərinə görə, bu, Fransanın Azərbaycana qarşı kəşfiyyat savaşlarında hər zaman maraqlı olması ilə bağlıdır: "Xüsusilə Bakı Təşəbbüs Qrupundan sonra Azərbaycanın müasir kolonializmə qarşı mübarizənin mərkəzində yer alması bu marağı daha da artırıb. Nəticədə, Fransa Afrika bölgəsində ciddi mövqe itirdi. Belə ki, 2021-ci ildən sonra Fransaya məxsus 9 hərbi bazadan 6-sı bağlanıb və hazırda Afrikada cəmi 3 baza fəaliyyət göstərir Bu kontekstdə, Bakıda ensarlarla işləmək və Türkiyə, Rusiya, Azərbaycan kimi dövlətlərə qarşı ortaq kəşfiyyat fəaliyyətində iştirak etmək müəyyən çərçivədə başa düşülə bilər. Düşünürəm ki, Azərbaycanın əks-kəşfiyyatı kifayət qədər güclüdür və xarici qüvvələrin maraqlarından asılı olmayaraq milli təhlükəsizliyin qorunmasında mühüm rol oynayır".
Sonda Ə. Əlibəyli bildirib ki, eyni zamanda, erməni faktoru da nəzərə alındıqda, bu mövzunun Azərbaycan üçün həssas əhəmiyyət kəsb etdiyi açıq görünür: "Bizdə olan digər məlumatlara əsasən, Fransa kəşfiyyatı eyni zamanda İran kəşfiyyatı ilə əməkdaşlıq edir. Bu baxımdan, Fransa kəşfiyyatının Bakıda apardığı fəaliyyətə erməni və İran kəşfiyyatlarının burada möhkəmlənməsi kimi də yanaşmaq mümkündür.
Pərvin Hacıyeva
15:14 02.04.2025
Oxunuş sayı: 997
