Zelenskidən hədə: "Putin öləcək" -Rusiya liderinə sui-qəsd hazırlanır?
Ukrayna Prezidenti Volodimir Zelenski Rusiya lideri Vladimir Putinin tezliklə öləcəyini söyləyib.
O, bu barədə “Eurovision News”un jurnalistləri ilə Putinin məqsədləri və qorxularından danışarkən deyib.
“O nədən qorxur – öz gücünü itirməkdən. Bu da cəmiyyətin sabitliyindən asılıdır, lakin onun yaşından da asılıdır – o tezliklə öləcək, bu faktdır və hər şey bitəcək”, – Zelenski müsahibəsində vurğulayıb.
72 yaşlı Putinin niyə “tezliklə” öləcəyini düşündüyünü Zelenski izah etməyib. BBC-yə görə, müsahibənin ümumi konteksti və bu ifadənin oradakı yeri Zelenskinin ən yaxın gələcəyi nəzərdə tutmadığını ehtimal etməyə imkan verir.
Ukrayna prezidenti düşünür ki, Rusiya prezidenti Putin artıq yaşlanıb və tezliklə öləcək. Onun sözlərinə görə, Rusiyanın sabitliyi birbaşa Putinin hakimiyyətdə qalmasından asılıdır. Həqiqətən də, Putinin ölümü Rusiya üçün çox şeyi dəyişə bilər.
Zelenskinin səsləndirdiyi fikirlər beynəlxalq ictimaiyyətdə ciddi sensasiya yaradıb. Onun fikirlərinə etinasız yanaşanlar olduğu kimi, kifayət qədər ciddi qəbul edənlər də var. Zelenskinin açıqlaması Putinə sui - qəsd ehtimalını da gündəmə gətirir. Ola bilərmi ki, ona sui - qəsd hazırlanır və Ukrayna lideri məhz bunun anonsunu verib?
Bu barədə Crossmedia.az-a açıqlama verən hərbi ekspert Üzeyir Cəfərov bildirib ki, bu açıqlama manipulyativ xarakter də daşıya bilər: "Hamı kimi o da bir gün öləcək, amma Zelenskinin məhz indi bu fikri səsləndirməsi maraqlı məqamdır. Məsələ burasındadır ki, son zamanlar tərəflər arasında təkcə silah yox, həm də söz savaşı gedir. Tərəflər bir - biriləri qıcıqlandırmağa, əsəblərini tarıma çəkməyə çalışırlar".
Ü.Cəfərov qeyd edib ki, Zelenski Putinin sülh istəmədiyini göstərmək istəyir: "ABŞ və Ukrayna siyasi rəhbrəliyində Rusiya ilə bağlı hansısa planın olduğunu iddia edənlər də var. Putin son vaxtlar özü də hiss edir ki, ortada real nəticə yoxdur. O, Rusiyanın bəzi şəhərlərini, məsələn, Kursk bölgəsinin müəyyən hissəsini geri qaytarır, əvəzində digər şəhərlərdə şiddətli döyüşlər başlayıe".
Ü. Cəfərov hesab edir ki, bütün bunlar müəyyən fikirlərin formalaşmasına səbəb olur: "Ehtimal ki, Rusiya rəsmiləri də tezliklə Zelenskinin öləcəyini, Ukraynanın çətinliklər yaşadığını və müharibədə məğlub olduğunu iddia edəcəklər. Artıq üç ildir ki, "nə isə olacaq" ifadəsini eşidirik. Hər şey mümkündür. Bizdə məşhur bir deyim var: "Ya vəlvələdən, ya zəlzələdən". Putin xəstəlikdən öləcək, yoxsa sui-qəsd nəticəsində? Bunu bilmirik. Mümkün sui- qəsdin ABŞ-nin, yaxud Ukraynanın təşkil edəcəyini də indidən proqnozlaşdırmaq doğru olmaz. Ümumiyyətlə, hələ bəlli deyil ki, Zelenski əslində nəyə işarə vururdu. Amma hər iki tərəf ciddi təhlükəsizlik tədbirləri görür.Zelenski ilk ildə heç bir yerə getmirdi. Lakin son iki ildə Vaşinqton, Türkiyə, Brüssel, Fransa və digər ölkələrə səfərlər edib. Putin isə aktiki olaraq xarici səfərlərini dayandırıb. Konkret olaraq danışsam, bildirməliyəm ki, belə açıqlamalar daha çox təbliğat xarakterlidir".
Müsahibimiz Rusiyanın atəşkəsə razı olmadığına diqqət çəkib: "ABŞ artıq anlayır ki, Putin atəşkəs məsələsini bilərəkdən uzadır. Hətta dünən Tramp açıqlama verdi ki, Putin süni əngəllər yaradır və müəyyən addımlar atır. Görünən odur ki, ABŞ prezidenti hələ də müsbət nəticəyə nail olmayıb. Bəzi razılaşmalar olsa da, real sakitlikdən söhbət gedə bilməz. Çünki təkcə bu gün baş verənlər göstərir ki, döyüşlər daha da amansızlaşır".
Fatimə Məmmədova
15:37 27.03.2025
Oxunuş sayı: 1876
