Rusiya ilə ABŞ arasında Ər-Riyadda nələr müzakirə olunub? - Bu məsələlər ictimaiyyətə açıqlanmayıb
ABŞ və Rusiya nümayəndələri arasında martın 24-də Ər- Riyadda keçirilən görüş fasilələrlə bir neçə raund davam edib. Görüşdə Rusiya- Ukrayna müharibəsinin gedişi, həmçinin mümkün sülh məsələsi müzakirə olunub. Hər iki tərəf görüşdən məmnunluğunu ifadə edib. Ancaq müzakirələrin əslində nə qədər effektiv olması hələ ki, müzakirə predmetidir.
Dünənki fikir mübadiləsi barədə Crossmedia.az-a danışan politoloq Oqtay Qasımov deyib ki, Rusiya və ABŞ nümayəndələri, danışıqlar zamanı müxtəlif məsələləri müzakirə ediblər: "Məlumata görə, görüş beş saatdan artıq davam edib. Bu, o deməkdir ki, tərəflər arasında müzakirə olunacaq və həllini tapacaq xeyli məsələ var. Bu məsələlərdən birincisi Rusiya-Ukrayna müharibəsi ilə bağlıdır. Savaşın dayandırılması və sülh prosesi üzrə danışıqların davam etdirilməsi, həmçinin dayanıqlı atəşkəsə nail olunmasıdır. Şübhəsiz ki, Qaradəniz məsələsi də müzakirə olunmalıdır. Çünki Qaradəniz artıq 3 gündür döyüş zonasına çevrilib. Bu, o deməkdir ki, Qaradənizdə atəşin dayandırılması, naviqasiya məsələlərinin həlli və yükdaşımaların daha təhlükəsiz hala gəlməsi məsələləri ön plana çıxır".
Ekspert qeyd edib ki, tərəflər arasında müzakirə olunan, amma ictimaiyyətə bildirilməyən məsələlər də mövcuddur: "Xüsusilə Arktika ilə bağlı məsələlər bu qəbildəndir. Rusiya danışıqlar başlamazdan öncə mətbuata müəyyən məlumatlar sızdırmışdı. Həmçinin Rusiya ABŞ-a Arktikada enerji resurslarının və nadir torpaq elementlərinin birgə istismarı ilə bağlı təkliflər etmişdi. Bu, o cümlədən Ukraynanın işğal altındakı ərazilərdə nadir torpaq elementlərinin birgə işlədilməsi və Rusiya ərazisində bu məsələnin həlli, Amerikan şirkətlərinin geri dönüşü ilə bağlıdır. Yəni, tərəflər arasında müzakirə olunacaq və həllini gözləyən bir çox məsələ var. Bundan əlavə, şübhəsiz ki, danışıqlarda İran məsələsi də müzakirə edilə bilər. Həmçinin, Trampın İran liderinə göndərdiyi məktubda ABŞ-ın tələbləri və Rusiyanın bu prosesdə vasitəçi qismində iştirakı məsələləri də gündəmə gələ bilər".
Zəhra Məmmədova
15:15 25.03.2025
Oxunuş sayı: 1055
