Üçüncü dünya müharibəsi yaxınlaşır: ABŞ-la Avropa arasında gərginlik artır
Rusiya-Ukrayna müharibəsi qlobal gərginliyi artırmaqda davam edir. ABŞ-nin prezidenti Donald Tramp hesab edir ki, bu münaqişə nəzarətdən çıxarsa, Üçüncü dünya müharibəsinə səbəb ola bilər. O, “OutKick” portalına verdiyi müsahibəsində vəziyyətin hələlik müəyyən qədər nəzarətdə olduğunu desə də, müharibənin yaratdığı təhlükəyə diqqət çəkib. ABŞ və Rusiya liderlərinin son telefon danışığında da əsas müzakirə mövzusu müharibənin mümkün həlli yolları olub.
Bu barədə Crossmedia.az-a danışan politoloq Aytən Qurbanova söyləyib ki, savaşın ilk günündən etibarən bu ehtimal var: "Tramp ukraynalı həmkarı Volodimir Zelenski ilə Ağ Evdə görüşündə onu üçüncü dünya müharibəsini başlatmaq ittiham etdi.
Hazırkı proseslər eyni templə davam edərsə, Ukraynanın təkbaşına Rusiyaya qarşı mübarizə aparmasının mümkünsüz olduğu açıq-aşkar görünür. Son hadisələr də bunu təsdiqləyir. Hərbi-siyasi bloklaşma sürətlə davam edir – Rusiya Çin və İranla danışıqlar aparır, həmçinin müxtəlif təşkilatlar daxilində əməkdaşlıq genişlənir
Politoloq qeyd edib ki, ABŞ və Rusiya arasında Ukrayna müharibəsinin bitirilməsi ilə bağlı danışıqlarda ciddi fikir ayrılıqları və boşluqlar mövcuddur: "Tramp artıq ilkin vədlərinə baxmayaraq, Ukrayna müharibəsini qısa müddətdə bitirə bilməyəcəyini anlayır. Əgər hadisələr bu formada davam edərsə, üçüncü dünya müharibəsinin başlama ehtimalı artır. Hətta 2-ci dünya müharibəsində olduğu kimi, bütün dünya dövlətlərinin prosesə cəlb olunması gözləniləndir. Təbii ki, bunun necə inkişaf edəcəyini gələcək hadisələr müəyyən edəcək".
A.Qurbanova vurğulayıb ki, Avropa İttifaqı (Aİ) olmadan Rusiya-Ukrayna müharibəsinin həlli istiqamətində danışıqlar aparmaq mümkün deyil: "Aİ-nin də masa arxasında olması mütləqdir. Hətta yayımlanan son və hələ rəsmi təsdiqini tapmamış məlumatlara görə Rusiyanın əsas tələblərindən biri Aİ-nin tətbiq etdiyi sanksiyaların ləğvidir. Bu isə onu göstərir ki, Avropa mütləq şəkildə danışıqlarda iştirak etməlidir. Trampın aqressiv ritorikası və Aİ-yə qarşı sərgilədiyi qeyri-konstruktiv mövqe davam edərsə, ABŞ və Avropa arasında qarşıdurmanın baş verməsi gözləniləndir. Çünki bu məsələlər yalnız Rusiya-Ukrayna müharibəsi ilə məhdudlaşmır. Trampın gömrük siyasəti və Avropaya qarşı sərt mövqeyi münasibətlərin daha da gərginləşməsinə səbəb ola bilər".
Xumar Emilqızı
14:20 24.03.2025
Oxunuş sayı: 25187
