ABŞ- Rusiya münasibətləri: "İki qoçun başı bir qazanda qaynayır"?
ABŞ-da Donald Tramp hakimiyyətə gələndən sonra Rusiya ilə münasibətlərdəki "buzlar əriməkdədədir". Bu tendensiya "İki qoçun başı bir qazanda qaynamaz" tesizinin doğruluğuna da şübhə yaradır. Görünür, lazım gələndə, istək olanda "iki, hətta üç qoçun da başı bir qazanda qaynayar".
Moskva-Vaşinqton münasibətlərinin perspektivi barədə Crossmedia.az-a danışan siyasi şərhçi Azər Qasımov bildirib ki, ABŞ və Rusiya arasında baş tutan danışıqlar fonunda dünya dövlətləri artıq yuxudan oyandılar: "Bu günə kimi "Qərb dəyərləri" kimi qəbul edilən demokratiya, insan haqları, beynəlxalq hüquq adında anlayışlar tarixin rəflərinə qaldırıldı. İki ölkə prezidentlərinin danışıqlarından Ukraynanın torpaqlarının bölünməsi qərarı çıxacağı artıq kəsindir.
Bundan sonra bütün ölkələr nə qeyd edilən dəyərlər uğrunda mübarizə aparacaq, nə də Qərbin bu dəyərlər uğrunda mübarizə aparan ölkələrə dəstək verəcəyi ilyuziyalarına qapılacaqlar. Güclü gücsüzü istədiyi vaxt əzə biləcək, ən azı bir müddət. Dünyanın demokratik kəsiminin isə əl-qolu bağlıdır. Artıq avtokratiyanın dövrüdür. Təbii ki, hələ qarşı tərəf öz sözünü deməyib. Onlar hazırlıqsız yaxalanıblar. Dünyanı yalnız bəyaz fonda gördüklərindən başqa rəngləri yaxın buraxmayıblar. Artıq bəyaz rəngin içərisindəki rənglər kənara çıxıb. Hər kəs dünyanın tək ağ rəngdən ibarət olmadığını açıq görüb. Dünya ağ rəngin "doğduğu" qara rənglə qarşı-qarşıya qalıb. Ya ağ rəng qara rəngi yenidən geri udmalıdır, ya da qara rəng qara dəliyə çevrilib bütün rəngləri udacaq".
Kənan Novruzov
20:50 21.03.2025
Oxunuş sayı: 1696
