Ərdoğan NATO Baş katibi ilə müzakirə etdi - "Rusiya Ukrayna müharibəsi ilə bağlı iki mümkün ssenari"
Türkiyə Prezidenti Rəcəb Tayyib Ərdoğan fevralın 18-də NATO Baş katibi Mark Rutte ilə telefonla danışıb. O, Rusiya-Ukrayna müharibəsində daimi atəşkəsin mümkün olduğunu bildirib. Ərdoğan bu mövzuda beynəlxalq təşkilatlarla təmasda olduğunu və sülhün təmin olunması üçün çalışdığını vurğulayıb.
Məlum olduğu kimi, son vaxtların əsas geosiyasi hadisələrindən biri məhz Rusiya- Ukrayna müharibəsidir. Davam edən savaşın beynəlxalq gündəmi zəbt etdiyini desək, yəqin ki, yanılmarıq.
Müharibənin üçüncü ilinin tamam olması ərəfəsində mümkün atəşkəslə bağlı Crossmedia.az-a danışan siyasi şərhçi Kənan Novruzov bildirib ki, bu, mümkündür: “Müşahidələr göstərir ki, müharibə layihəsi başa çatmaq üzrədir. Artıq danışıqlar mərhələsi başlayır və əsas məsələ bu danışıqların hansı tərəflərin iştirakı ilə baş tutacağıdır. ABŞ hazırda əsas iştirakçı kimi görünür. Lakin Vaşinqtonun ritorikası Ukraynanı tam qane etmir. Çünki ABŞ müəyyən mərhələdə Rusiyaya güzəştə getməyə meylli görünür. Bu isə Ukraynanın ərazi bütövlüyü və suverenliyi üçün təhlükə yarada bilər. Buna görə də Ukrayna Prezidenti Volodimir Zelenski Avropa İttifaqının (Aİ) da danışıqlarda iştirakını tələb edir. Çünki Aİ də ABŞ-dən fərqli mövqedədir və Rusiyaya güzəştə getmək niyyətində deyil. Aİ hesab edir ki, güzəştlər Rusiyanı daha da irəliləməyə təşviq edə bilər və bu da Avropanın təhlükəsizliyi üçün təhdid yaradar".
K.Novruzovun fikrincə, Ərdoğanın daimi atəşkəslə bağlı açıqlaması real görünür. Müharibənin iki əsas ssenari üzrə davam edəcəyini qeyd edən ekspert bildirib ki, ya atəşkəs təmin olunaraq müharibə dondurulacaq, ya da ərazi mübadiləsi baş verəcək: "Müharibənin dondurulması Ukraynanın məğlubiyyəti deməkdir. Çünki Rusiya artıq xeyli ərazini nəzarətə götürüb. Digər ssenari isə ərazi mübadiləsidir. Yəni Rusiya Kursk vilayətini geri qaytararaq bəzi əraziləri Ukraynaya verə bilər. Lakin Krım, Donbas və Xerson kimi strateji bölgələr Rusiyanın nəzarətində qalacaq. Ukraynanı danışıqlara razı salmaq üçün ABŞ Kiyevə indiki şərtlərlə sülhə getməyin daha məqsədəuyğun olduğunu izah etməlidir. Əgər Ukrayna indi danışıqlara getməsə, gələcəkdə vəziyyət daha da ağırlaşa bilər", – o əlavə edib.
Fatimə Məmmədova
17:11 19.02.2025
Oxunuş sayı: 13061
