Rusiya-Ukrayna müharibəsi layihəsinin ikinci mərhələsi: “Aİ zəifləyəcək”
Rusiya- Ukrayna müharibəsi layihəsi tədricən tamamlanır. Daha doğrusu, birinci mərhələ. İndi danışıqlar mərhələsi başlanır. Ukrayna narahatdır. Prezident Volodimri Zelenskinin əsas narahatlığı ölkəsinin iştirakı olmadan danışıqların başlanacağıdır. Belə olsa, rəsmi Kiyev tamamilə oyundankənar vəziyyətdə qalacaq və bir də gözünü açacaq ki qurbana çevrilib.
Bu barədə Crossmedia.az açıqlamasında politoloq, professor Əlimusa İbrahimov bildirib ki, ABŞ-nin prezidenti Donald Tramp Ukrayna münaqişəsinin həlli üçün Rusiya ilə birbaşa danışıqları dəstəkləyir və ilkin mərhələdə nə Kiyevin, nə də Avropa İttifaqının bu prosesdə iştirakını zəruri sayır: “Onun strategiyasına görə, bu güclər sonradan müzakirələrə qoşula bilər. Həmçinin Moskva da Avropa və Ukraynanın danışıqlarda iştirakına qarşı çıxır. Rusiya hesab edir ki, Qərb Ukraynaya dəstək verməklə müharibənin davam etməsinə səbəb olur və sülh prosesinə maneçilik törədir. Kreml işğal etdiyi əraziləri əlində saxlamaq, Ukraynanın NATO-ya üzv olmasının qarşısını almaq və xarici qüvvələrin regiona yerləşdirilməsinə mane olmaq kimi tələblər irəli sürür. Digər tərəfdən, Avropa İttifaqı müharibənin Ukraynanın qələbəsi ilə nəticələnənə qədər davam etməsini istəyir. Lakin resurs çatışmazlığı bu strategiyanın həyata keçirilməsini çətinləşdirir. Ukrayna isə Rusiyanın şərtlərini qəbul etməyə hazır olmadığını bildirir”.
Politoloq həmçinin bildirib ki, siyasi analitiklərin fikrincə, Tramp Rusiya ilə kompromis əldə edərək sülh sazişinə nail olmağa çalışacaq: “Əgər bu mümkün olmasa, müharibə davam edəcək. Beləliklə, həm Aİ, həm də Ukayna zəifləyəcək”.
Fidan Xəlilova
16:51 19.02.2025
Oxunuş sayı: 20543
