İkinci dünya müharibəsindən sonra Rusiya üçün ilk: Böyük məğlubiyyət?
Ukrayna Prezidenti Volodimir Zelenski Ankarada türkiyəli həmkarı Rəcəb Tayyib Ərdoğanla birlikdə keçirdiyi mətbuat konfransında deyib ki, nə Rusiya, nə də Ukrayna silahla qalib gələ bilər: “Rusiya bunu istəsə də, məqsədinə çatmadı. Rusiya sülh istəyirsə, əsir mübadiləsinə razı olmalıdır: Təhlükəsiz zəmanəti yeni müharibənin başlamaması üçündür”.
Üç ildir davam edən müharibədə Rusiya, doğrudanmı, məqsədinə çatmadı?
Bu barədə Crossmedia.az-a danışan hərbi ekspert Azad İsazadə bildirib ki, Ukrayna ordusunun zəiflədiyi və hücum qabiliyyətinin azaldığı iddia edilsə də, faktlar rəsmi Kiyevin Moskvaya qarşı müqavimət göstərməyə davam etdiyini göstərir: “Hətta bəzi hallarda Ukrayna ordusu uğur əldə edib. Rusiyanın Kursk vilayətinə hücum və ərazinin müəyyən hissəsinin tutulması bunun ən bariz nümunəsidir. Hazırda cəbhədə vəziyyət neytral görünür. Nə Rusiya tam irəliləyə bilir, nə də Ukrayna düşməni tamamilə geri çəkilməyə məcbur edə bilir. Müharibə faktiki olaraq “heç-heçə” vəziyyətinə gəlib çıxıb. Hər iki tərəf ciddi itkilər verir, lakin həlledici qələbə hələ ki, görünmür”.
A.İsazadə qeyd edib ki, Rusiya hələ də əsas məqsədinə çata bilməyib: “Qara dənizdə donanmasının böyük hissəsini itirib, həmçinin İkinci Dünya Müharibəsindən bəri ilk dəfə öz ərazisində düşmən qüvvələrinin yerləşməsi faktı ilə qarşılaşıb. Müharibənin əvvəlində Rusiya qoşunlarının iki-üç gün ərzində Kiyevi ələ keçirəcəyi proqnozlaşdırılırdı. Lakin bu baş vermədi. Üstəlik, Rusiya Donetsk vilayətini hələ də tam nəzarətə götürə bilməyib. Bu da müharibənin gözlənildiyindən daha uzun və mürəkkəb olduğunu göstərir.”
Fidan Xəlilova
15:58 19.02.2025
Oxunuş sayı: 11370
