Rusiya-Ukrayna arasında danışıqların təfərrüatları: "15 faiz ərazi..."
Ukrayna Prezidenti Volodimir Zelenski Münhen Təhlükəsizlik Konfransı zamanı bildirib ki, Rusiya ilə sülh sazişinin imzalanmasından danışmaq hələ tezdir.
Məlum olduğu kimi, savaş artıq üç ildir ki, davam edir və indiyədək heç bir danışıqlar masası qurulmayıb. Rusiya tərəfi danışıqlarda maraqlı olduğunu bildirsə də, Ukrayna onun irəli sürdüyü şərtlərlə razılaşmır. Nəticədə vəziyyət dəyişməz olaraq qalır.
Bəs ukraynanın istəyi nədən ibarətdir? Sülh üçün hansı addımlar atılmalıdır?
Mövzu ilə bağlı politoloq Tofiq Abbasov Crossmedia.az saytına açıqlama verib:
“Ukraynanın hazırkı davranışı olduqca anlaşılmazdır. Ukrayna Rusiyayla bərabərhüquqlu şəkildə danışmaq istəyirdi və Ukrayna Prezidenti Volodimir Zelenskinin istəyi bundan ibarət idi. Ancaq Rusiya bildirir ki, Volodimir Zelenskinin prezident səlahiyyətləri bitib və o heç kimdir. Rusiya Ukraynadan qeyri-rəsmi özünü qanuniləşdirən Zelenski ilə yox, Ukraynanın rəsmi şəxsləri ilə danışıqlar aparmaq istəyir. Zelenski düşünürdü ki, Donald Tramp hakimiyyətə gəldikdən sonra Ukraynaya yardım proqramlarını gücləndirəcək. Amma biz Trampın məramının tamam başqa olduğunu gördük. Tramp bu müharibənin birmənalı şəkildə dayandırılmasından yanadır. Ukraynada hərbi əməliyyatların dayandırılması ətrafında danışıqlar olacaq. Lakin üçtərəfli, yox ikitərəfli formatda, Rusiya və ABŞ rəsmiləri ilə. Ukrayna nümayəndələri burada iştirak edə bilər. Amma heç bir səs hüququ olmadan. Danışıqların ilkin mərhələsi hərbi əməliyyatların dayandırılmasını və Ukraynanın 15% ərazisinin Rusiyaya keçməsini əhatə edəcək. Sonrakı mərhələdə Ukraynanın bərpası məsələləri müzakirələr yolu ilə öz həllini tapacaq”.
Ayhan Ağarzayev
15:10 15.02.2025
Oxunuş sayı: 9313
