Türkiyə NATO üçün strateji açar rolunu oynayır - AÇIQLAMA
NATO-nun Baş katibi Mark Rütte Türkiyənin müdafiə sənayesini yüksək qiymətləndirib. O, bu fikrini alyansın Müdafiə Nazirləri İclasından öncə jurnalistlərə verdiyi açıqlamada bildirib. Rütte, Türkiyənin NATO və Avropanın müdafiə sənayesinin gücləndirilməsindəki mühüm rolunu vurğulayıb. Baş katib eyni zamanda Türkiyənin yeni ABŞ administrasiyasının gündəmində olan Ukraynada sülhün təmin edilməsinə töhfə verə biləcəyini qeyd edib: “Türkiyə müdafiə sənayesinin təməli həqiqətən təsirlidir”. – deyə Rütte bildirib.
Bu açıqlama Türkiyənin müdafiə sənayesinin qlobal arenada artan əhəmiyyətini və NATO daxilindəki strateji mövqeyini bir daha ön plana çıxarıb.
Məsələ ilə bağlı Türkiyənin Qafqaz Strateji Araşdırmalar Mərkəzinin (KAFKASSAM) sədri, politoloq Hasan Oktay Crossmedia.az-a danışıb: “Türkiyə NATO-nun ən önəmli üzvlərindən biridir. Hərçənd indiyə qədər NATO Baş katibliyi Türkiyəyə verilməyib, yəni heç bir türk NATO Baş katibi olmayıb, lakin Türkiyənin NATO daxilindəki ağırlığı olduqca əhəmiyyətlidir. Silahlı qüvvə olaraq Türkiyə NATO-ya hərtərəfli dəstək verir. Soyuq müharibə dövründə sərhədə ən yaxın NATO ölkəsi olaraq Türkiyə kritik vəzifələr icra etmişdir. Türkiyənin müdafiə sənayesində inkişaf etdirdiyi sistemlərin NATO ilə inteqrasiyası həm alyansa böyük güc və dəyər qatır, həm də Avropa İttifaqı ölkələrinin Rusiya qarşısında önəmli təhlükəsizlik qalxanı formalaşdırır. Ukrayna böhranı isə Türkiyənin NATO üzvü ölkələr üzərindəki təsirini artırıb”.
Politoloq, Türkiyənin NATO daxilindəki strateji mövqeyinin xüsusilə ABŞ-ın yeni rəhbərliyi dövründə daha da önəm qazandığını bildirib: “Trampın ikinci dönəm hakimiyyəti ilə birlikdə Avropa İttifaqı ölkələrinə NATO üzərindən təzyiq artacağı təqdirdə, balans elementi kimi Türkiyənin rolu olduqca dəyərlidir”, – deyə Hasan Oktay vurğulayıb.
Maral Şahverdili
19:27 14.02.2025
Oxunuş sayı: 12196
