Xarici xəbərlər

Estoniya Baltik dənizindən keçidə görə rüsum tətbiq etməyi təklif edir

Estoniyanın müdafiə naziri Xanno Pevkur Baltik dənizindən keçən gəmilərin rüsum ödəməsini təklif edib.
Crossmedia.az xəbər verir ki, o, bu barədə Reuters agentliyinə müsahibəsində bildirib.
“Bəlkə də, gələcəkdə şirkətlərin Danimarka boğazlarından keçid üçün ödəniş etdiyini görəcəyik. Çünki bu, əsasən, sualtı kabellərin zədələnməsi riskinə qarşı bir növ sığorta haqqıdır”, – deyə Pevkur qeyd edib.
Nazirin sözlərinə görə, bu cür insidentlərin qarşısını almaq üçün yaxın zamanda dəniz akvatoriyasında xüsusi sensorlar və infrastrukturun qorunması üçün baryerlər quraşdırıla bilər.
Xatırladaq ki, yanvarın 26-da Latviya ilə İsveç arasında çəkilmiş sualtı optik lif kabeli zədələnib və bunun xarici müdaxilə nəticəsində baş verdiyi ehtimal olunur. Hadisədən sonra Latviya Baş naziri Evika Siliņa məsələ ilə bağlı təcili iclas çağırıb.
Bu, Baltik dənizində baş verən ilk belə hadisə deyil. 2024-cü il dekabrın 26-da Finlandiya sərhəd xidməti Eagle S tankerini saxlayıb. Tankerin Finlandiyanı Estoniya ilə birləşdirən Estlink 2 sualtı elektrik kabelinin zədələnməsində rol oynadığı ehtimal edilir. Bundan əvvəl isə Baltik dənizində C-Lion1 və Arelion rabitə kabelləri, həmçinin Balticconnector qaz kəməri zədələnib.
Estoniyanın xarici işlər naziri bu cür hadisələrin Rusiyanın “kölgə donanmasının” fəaliyyəti ilə bağlı ola biləcəyini bəyan edib.
Gültac Mehdizadə