ABŞ Dövlət Departamentinin yeni rəhbəri ilk rəsmi səfərini bu ölkəyə edəcək
ABŞ-ın dövlət katibi Marko Rubio Latın Amerikası ölkələrinə səfəri çərçivəsində Panamaya rəsmi səfər etməyi planlaşdırır.
Crossmedia.az bu barədə “Politico”ya istinadən xəbər verir.
Məlumatlara görə, Rubio Panamadan əlavə Qvatemala, Salvador, Kosta-Rika və Dominikan Respublikasını da ziyarət etməyi nəzərdə tutur. Bu səfərlər onun dövlət katibi kimi ilk rəsmi səfəri olacaq.
Dövlət Departamentinin nümayəndəsi Temmi Brüs səfərin ümumi planını təsdiqləyib. Onun sözlərinə görə, Rubio Qərb yarımkürəsindəki ölkələri ziyarət etmək qərarına gəlib, çünki “biz bu bölgədə yaşayırıq.” Brüs əlavə edib: “Digər administrasiyaların etdiyi kimi, biz regionu daha çox görməzdən gəlməyəcəyik. Qonşularımızla əməkdaşlıq miqrasiya, təchizat zəncirləri və iqtisadi artım problemlərinin həlli üçün həyati əhəmiyyət daşıyır.”
“Politico”nun məlumatına görə, Marko Rubio səfər zamanı qeyri-leqal miqrasiya məsələlərinə və Panamanın ABŞ-a geri qaytarılması məsələsinə toxunacaq. Bloomberg yazır ki, Rubio bu səfərlə prezident Donald Trampın Latın Amerikası ölkələrindən qeyri-leqal miqrasiyanın qarşısını almaq istəyini nümayiş etdirmək məqsədi güdür.
Adətən dövlət katibi ilk xarici səfərini ABŞ-ın geosiyasi müttəfiqlərinə edir. Əvvəlki dövlət katibi Antoni Blinken 2021-ci ildə ilk səfərini Yaponiyaya, Reks Tillerson isə 2017-ci ildə Almaniyaya etmişdi.
ABŞ prezidenti Donald Tramp 20 yanvarda andiçmə mərasimində bir daha bəyan edib ki, Panamadan keçən ticarət və hərbi gəmilər üçün keçid haqqı azaldılmadığı halda, Panamanın ABŞ-ın nəzarətinə qaytarılmasına çalışacaq. Panamanın prezidenti Xose Raul Mulino isə bəyan edib ki, Panama kanalı Panama dövlətinin tərkibində qalacaq.
Qeyd edək ki, ABŞ-a Meksika sərhədi vasitəsilə qeyri-leqal yolla keçmək istəyən miqrantların əksəriyyəti Qvatemala və Salvador da daxil olmaqla Latın Amerikası ölkələrindən gəlir. Bu ölkələr Marko Rubionun səfər etməyi planlaşdırdığı yerlər arasındadır.
Gültac Mehdizadə
12:40 23.01.2025
Oxunuş sayı: 3377
