Xarici xəbərlər
ABŞ liderindən yaşıl işıq: TikTok satılır
Hazırda TikTok tətbiqinin gələcəyi və mümkün satış detalları diqqət mərkəzindədir. ABŞ-nin yeni prezidenti Donald Tramp TikTok-un gələcəyi ilə bağlı diqqətçəkən açıqlamalar verib.
Crossmedia.az xarici KİV-ə istinadən xəbər verir ki, süni intellekt infrastrukturuna dair investisiya əməkdaşlığı elan edərkən Trampdan TikTok-un ABŞ-dəkı əməliyyatlarının yeni sahibinin kim ola biləcəyi soruşulub. O, İlon Mask və ya Oracle şirkətinin rəhbəri Larry Ellison-un platformanı ala biləcəyini qeyd edib.
"TikTok İlon Mask və ya Larry Ellison-a satılsın", – deyə o vurğulayıb.
Məlumata görə, Çin mərkəzli ByteDance şirkətinə məxsus olan TikTok hazırda ABŞ-də qeyri-müəyyən bir prosesdən keçir. Tətbiq ölkədə rəsmi olaraq qadağan edilib. Buna baxmayaraq, Tramp tətbiqin 75 gün daha aktiv qalmasını təmin edən fərman imzalayıb. Beləliklə, vəziyyət daha da mürəkkəbləşib.
Bu fərmanın səbəbi ABŞ Ali Məhkəməsinin TikTok-un yerləşdirildiyi tətbiq mağazalarına və xidmət təminatçılarına qarşı tətbiq edilən milli təhlükəsizlik qanununun etibarlılığını təsdiqləməsidir.
Qeyd edək ki, TikTok-un ABŞ-dəki əməliyyatlarının təxminən 50 milyard dollar dəyərində olduğu güman edilir. Tramp isə tətbiqin ABŞ-də fəaliyyət icazəsi olmadan dəyərsiz olacağını, lakin bu icazə ilə 1 trilyon dollar dəyərinə çata biləcəyini iddia edir.
Fatimə Məmmədova
20:36 22.01.2025
Oxunuş sayı: 633
