Xarici xəbərlər

Almaniya Kansleri Şolts: ABŞ Tramp dövründə də yaxın müttəfiq olaraq qalacaq

Almaniya Kansleri Olaf Şolts bildirib ki, ABŞ Donald Trampın prezidentliyi dövründə də Almaniyanın ən yaxın müttəfiqlərindən biri olaraq qalmağa davam edəcək.
Crossmedia.az xarici KİV-ə istinadən xəbər verir ki, İsveçrənin Davos şəhərində keçirilən 55-ci Dünya İqtisadi Forumu (WEF) çərçivəsində WEF-in qurucusu Klaus Şvab ilə birgə xüsusi sessiyada çıxış edən Şolts, Tramp administrasiyası dövründə ABŞ-Almaniya münasibətlərinin potensialına nikbin yanaşdığını qeyd edib.
"ABŞ bizim Avropadan kənarda ən yaxın müttəfiqimizdir. Və bunun belə qalmasını təmin etmək üçün əlimdən gələni edəcəyəm", – deyə kansler vurğulayıb.
“Sosial medianın təsiri altında daima gərginlik içində olan dünyada soyuqqanlı yanaşmalara ehtiyac var. Vaşinqtonda keçirilən hər mətbuat konfransı bizi gərgin və mövcudluğumuzu sual altına alan müzakirələrə sürükləməməlidir. Bu, Vaşinqtonda baş verən hakimiyyət dəyişikliyindən sonra da qüvvədədir. Biz avropalılar öz aramızda güclü olmalıyıq", – Şolts əlavə edib.
Almaniya kansleri, Avropa ilə ABŞ arasındakı əməkdaşlığın dünya miqyasında sülh, təhlükəsizlik və iqtisadi rifah üçün əhəmiyyətini vurğulayaraq, Avropanın özünə daha çox güvənməli olduğunu qeyd edib:
"Biz avropalılar öz aramızda güclü olmalıyıq. Daxili birliyimizi möhkəmləndirməli və qlobal tərəfdaşlarımızla birlikdə hərəkət etməliyik. Daha rəqabətqabiliyyətli və dayanıqlı olmalıyıq və bunu etmək üçün lazım olan hər şeyə sahibik".
Şolts, Tramp administrasiyasının gələcək illərdə enerji və iqlim siyasəti, ticarət siyasəti, xarici və təhlükəsizlik siyasəti də daxil olmaqla bir çox sahədə dünyanı "təzyiq altında" saxlayacağını bildirib. O deyib: "Prezident Tramp bütün bunları dünən açıqladı və biz bu çətinliklərin öhdəsindən gələ biləcəyik və gələcəyik".
Dünyada “sülh və təhlükəsizlik” mövzularında şəffaflığa və qətiyyətə ehtiyac olduğunu bildirən Şolts əlavə edib: “Beynəlxalq nizamın ən əsas prinsiplərini qorumaq üçün əlimizdən gələni etməliyik və bu prinsiplərin ən əsası sərhədlərin toxunulmazlığıdır. Bu, hər zaman və hər yerdə keçərlidir. Bu prinsipi sual altına alan hər kəs, bütövlükdə beynəlxalq nizamı sual altına alır”.
Şolts həmçinin Avropa və Almaniyada ifadə azadlığının mövcud olduğunu vurğulayıb: “Hər kəs, hətta milyarder olsa belə, istədiyini söyləyə bilər. Lakin qəbul etmədiyimiz odur ki, bu, sağçı ekstremist mövqeləri dəstəkləmək anlamına gəlməməlidir”.
Qeyd edək ki, ABŞ-nin yeni prezidenti Donald Trampın vəzifəyə başlama mərasimində Elon Maskın etdiyi əl hərəkəti internetdə nasist salamına bənzədilib və geniş müzakirələrə səbəb olub.
Fatimə Məmmədova