20 Yanvar faciəsinə həsr olunmuş silsilə tədbirlər keçirilib
20 Yanvar faciəsinin 35-ci ildönümündə “Böyük Qayıdış” Gənclər Təşkilatının İdarə Heyətinin üzvlərinin, Vətən müharibəsi qazilərinin, Qayıdış Könüllülərinin və üzv gənclərin iştirakı ilə Şəhidlər xiyabanı ziyarət olunub.
Crossmedia.az xəbər verir ki, ölkəmizin suverenliyi və müstəqilliyi uğrunda canından keçmiş şəhidlərimizin əziz xatirəsi dərin ehtiramla və qürurla yad edilib, qəhrəman Vətən övladlarının xatirəsinə ucaldılmış “Əbədi məşəl” abidəsinin önünə və şəhid məzarlarına gül dəstələri qoyulub.
Faciənin 35-ci ildönümü ilə əlaqədar Milli Azərbaycan Tarixi Muzeyində "20 Yanvar – Qəhrəmanlıq salnaməsi" adlı anım tədbiri keçirilib. Tədbirdə Milli Azərbaycan Tarixi Muzeyinin elmi katibi, tarix üzrə fəlsəfə doktoru, dosent Sevinc Nəsirova, Gənclər Fondunun şöbə müdiri Pərviz Mirələmli, “Böyük Qayıdış” Gənclər Təşkilatının sədri Nail Şükürov, 1990-cı ilin Qanlı Yanvar hadisələrini əks etdirən fotoçəkilişlərin müəlliflərindən biri olan fotomüxbir Rasim Sadıxov və Vətən müharibəsi qazisi Həsən Yaqubov çıxış edərək həmin gecə baş verənlər, həmçinin həmin dövrdə Azərbaycanda ictimai-siyasi vəziyyət, milli azadlıq hərəkatı və xalqımızın mübarizlik ruhu haqqında gənclərə ətraflı məlumat veriblər. Tədbirin yekununda gənclər muzeyin 20 Yanvar faciəsinə və Vətən müharibəsinə aid kolleksiyalarından ibarət bölmələri ilə tanış olublar.
Bundan başqa, "20 Yanvar: Xatirələrdən gələcəyə" adlı panel müzakirəsi keçirilib. “Böyük Qayıdış” Gənclər Təşkilatının İdarə Heyətinin üzvü, Aprel döyüşləri qazisi Əhliyət Mehdiyevin moderatorluğu ilə keçirilən tədbirdə 20 Yanvar faciəsinin canlı şahidləri olan Cavid Abdullayev, Tahir Fətullayev və Asif İbrahimov çıxış edərək öz xatirələrini gənclərlə bölüşüb, sualları cavablandırıblar.
Silsilə tədbirlər çərçivəsində "20 Yanvar – danışan talelər" adlı növbəti tədbir Gənclər Təşkilatlarının Resurs Mərkəzində təşkil olunub. Tədbirdə faciə şahidləri “Azərbaycan Bayrağı” ordenli polkovnik Hikmət Ağayev, Qarabağ qazisi Valeh Hüseynov və İmran İsgəndərzədə çıxış ediblər. Daha sonra “20 Yanvarda doğulanlar” filmi nümayiş olunub.
Qeyd edək ki, tədbirlər proqramı Gənclər Fondunun dəstəyi, Gənclər Təşkilatları Milli Şurasının (NAYORA) tərəfdaşlığı ilə həyata keçirilib.
18:38 20.01.2025
Oxunuş sayı: 12757
