Əl-Tani: "Bu razılaşma Qəzzanın xilası üçün son şansımızdır"
Qətərin baş naziri və xarici işlər naziri Şeyx Məhəmməd bin Əbdürrəhman Əl-Tani İsrail və HƏMAS arasında atəşkəs razılaşmasının Qəzza üçün son şans olduğunu və uğursuzluğa düçar olmaq variantlarının olmadığını bildirib.
Crossmedia.az xəbər verir ki, o bu barədə Əl-Cəzirə kanalına verdiyi müsahibəsində danışıb. Atəşkəs razılaşması uğursuz olarsa, nəticələrinin nə olacağı sualına Əl-Tani, "Uğursuzluq bir seçim deyil. Əgər uğursuz olarsa, biz təslim olmayacağıq. Bunun yenidən gündəmə gətirilməsini və tərəflərin tələblərə əməl etməsini təmin edəcəyik" - deyib.
Əl-Tani Qətər, Misir və ABŞ-nin atəşkəs danışıqlarında vasitəçi kimi mühüm rol oynadığını vurğulayıb. Həmçinin Qəzzada atəşkəs razılaşmasının əldə olunmasında Bayden administrasiyası ilə ABŞ-nin seçilmiş prezidenti Donald Trampın komandasının birgə fəaliyyətinin həlledici rol oynadığını da vurğulayıb.
Əl-Tani Qətərin vasitəçi roluna sadiqliyini vurğulasa da, Qətərin Fələstin məsələsində aydın mövqeyini və Qəzza xalqına dəstəyini təkrarlayıb. O, Qətərin razılaşmada vasitəçi olduğunu və Qəzzanın müharibədən sonra idarə olunmasının fələstinlilərin öz işi olduğunu vurğulayıb. Həmçinin Qahirənin razılaşmaya nəzarət edəcəyini bildirib.
İngilis xəbər kanalı "Sky News"a da xüsusi açıqlamalar verən Əl Təni, tənqidi fikirlərini də bildirib: "Heç bir mənası olmayan detalları müzakirə edərək 13 ay vaxt itirildi" - dedi Təni.
Müqavilə bazar günü, yanvarın 19-da qüvvəyə minəcək. 3 mərhələdən ibarət olacaq. Atəşkəs razılaşmasının ilk 42 günündə 33 israilli məhbus azad ediləcək. Razılaşma Qəzza zolağına hərtərəfli humanitar yardımın çatdırılmasını, eləcə də köçkün fələstinlilərin öz ərazilərinə qayıtmasını ehtiva edir.
Tərlan Əmrahova
17:15 18.01.2025
Oxunuş sayı: 6818
