Xəbərlər

İki ölkə arasında 30-a yaxın sahədə razılaşma əldə olunub

İran və Rusiya arasında 30-a yaxın sahədə razılaşma əldə olunub.

Crossmedia.az “Tasnim News”-ə istinadən xəbər verir ki, İslam Respublikasının Moskvadakı səfiri Kazım Cəlali İran və Rusiya arasında 30-a yaxın sahədə razılaşma olduğunu açıqlayıb.

“Tehran və Moskva arasında hərtərəfli əməkdaşlıq sazişi siyasət, ikitərəfli münasibətlər, regional və beynəlxalq məsələlər, müdafiə, hərbi və kiber əməkdaşlıq, terrorizmlə mübarizə, Xəzər dənizinin mühafizəsi kimi müxtəlif sahələrdə əməkdaşlığın əsasını qoyub”, - deyə, səfir bildirib.

İran diplomatının sözlərinə görə, müqavilə hər iki tərəfin maraqları və qarşılıqlı ehtiyaclar əsasında düzgün şəkildə tərtib edilib.

İranın xarici işlər naziri Abbas Əraqçı da Tehran və Moskva arasındakı hərtərəfli əməkdaşlıq sazişinə toxunub:

“İran-Rusiya müqaviləsinin mahiyyəti əsasən iqtisadi xarakter daşıyır və bütün iqtisadi sahələrə, o cümlədən ticarət, turizm, nəqliyyat və s. əhatə edir. Bu müqavilə, eləcə də iqtisadi sahədən başqa, mədəni, elmi, məhkəmə, hüquq, rabitə və s. əməkdaşlıq sahələrini də əhatə edir və iki ölkə arasında münasibətlərin demək olar ki, bütün aspektlərini özündə daşıyır”.

Abbas Əraqçı qeyd edib ki, iki ölkə arasında münasibətlərdə belə bir təməl qoyularaq, bundan sonra iqtisadi, siyasi və mədəni əlaqələr sahələrində daha asan və daha uğurlu çərçivə və kontekstdə irəliləyəcəklərinə ümid edir. Onun sözlərinə görə, bu münasibətlər indiyə qədər uğurlu olub və bu çərçivədə daha da yaxşılaşacaq.