Son 40 ilin ən böyük yanğını : 25 nəfər dünyasını dəyişib
Son 40 ilin ən böyük şəhər ərazisi Kaliforniyada yanıb. ABŞ-nin Kaliforniya ştatında keçən həftə başlayan və hələ də davam edən iki meşə yanğını, 1980-ci illərdən bəri baş verən yanğınlardan daha çox şəhər ərazisini külə döndərib.
Crossmedia.az TRT Haber-ə istinadən bildirir ki, Madison şəhərində yerləşən Viskonsin Universitetinin Silvis Laboratoriyasından əldə etdiyi məlumatların təhlili göstərib ki, Los-Ancelesin Palisades və Eaton bölgələrində baş verən yanğınların dağıdıcı təsiri son 40 ildə görünməmiş səviyyədədir.
Belə ki, Los-Ancelesin Palisades və Eaton bölgələrində təxminən 10 gündür davam edən yanğınlar nəticəsində təxminən 10,36 kvadrat kilometr şəhər ərazisi külə çevrilib. Bu göstərici, 2018-ci ildə bölgədə baş vermiş Woolsey yanğınının məhv etdiyi ərazinin 2 qatından artıqdır. Güclü və davamlı küləklərin təsiri ilə daha da genişlənən hazırkı yanğınlar nəticəsində çox sayda ev və iş yeri alovlar içində qalıb.
Qeyd edək ki, yanğınlar yanvarın 7-də Pacific Palisades bölgəsində başlayıb və Eaton, Hurst, Sunset, Woodley kimi bölgələrə sürətlə yayılıb. Yanğın nəticəsində ən azı 25 nəfər həyatını itirib. Minlərlə hektar ərazi külə çevrilib və yanğınların ümumi zərəri ilə iqtisadi itkisinin 250-275 milyard dollar arasında olduğu təxmin edilir.
Fatimə Məmmədova
16:05 18.01.2025
Oxunuş sayı: 2221
