Nazir açıqladı: Ukraynaya alman qoşunları göndərilə bilər
Almaniyanın müdafiə naziri Boris Pistorius Qərb ölkələrini atəşkəsdən sonra Ukraynaya veriləcək təhlükəsizlik zəmanətlərinin bir hissəsini açıqlamamağa çağırıb.
Crossmedia.az xəbər verir ki, o, bu barədə Alman mediasına açıqlamasında danışıb.
Pistoriusun sözlərinə görə, təfərrüatlar açıqlanmamalıdır. Əks halda Rusiya Ukraynanı və müttəfiqlərini nəyin narahat etdiyini dəqiq biləcək və bu barədə danışıqlar strategiyası qura biləcək.
Pistorius atəşkəs razılaşması əldə olunacağı təqdirdə alman qoşunlarının Ukraynaya sülhməramlı kimi göndərilməsi ilə bağlı mümkün planları da şərh edib.
“Zamanı gələndə bu məsələ müzakirə olunacaq. Biz NATO-nun Avropadakı ən böyük tərəfdaşıyıq. Aydındır ki, biz öz rolumuzu oynamalı və məsuliyyəti öz üzərimizə götürməli olacağıq” - deyə nazir bildirib.
Eyni zamanda, o qeyd edib ki, ilk növbədə Ukrayna üçün tələb olunan təhlükəsizlik səviyyəsinin tam olaraq necə təmin olunacağına qərar verməliyik.
Tərlan Əmrahova
14:46 18.01.2025
Oxunuş sayı: 2111
